De Gea e Di María poderían regresar para o partido desta fin de semana contra o Arsenal
20 nov 2014 . Actualizado á 19:45 h.O técnico do Manchester United, o holandés Louis van Gaal, confirmou hoxe na cadea de televisión do club que o dianteiro colombiano Radamel Falcao García «ten unha nova lesión» e que «necesitará polo menos dúas semanas para regresar co primeiro equipo».
«Falcao volveuse a lesionar e non poderá estar co primeiro equipo polo menos durante as próximas dúas semanas», dixo o preparador holandés a MUTV.
O atacante de Santa Marta, que xa se perdeu os últimos tres encontros cos diaños vermellos, únese así á lista de baixas do United para o partido deste sábado fronte ao Arsenal no Emirates Stadium.
Tres xogadores que poderían regresar ante os gunners son o español David de Gea, o arxentino Ángel Di María e o inglés Michael Carrick, xa recuperados das súas respectivas lesións.
«É difícil dicir se están de volta, xa que temos que agardar á sesión de adestramento do venres para decidir se poden xogar o sábado», explicou Van Gaal.
«Unha cousa é dicir que estean de volta e outra moi diferente que estean de volta no equipo. Para min, os xogadores teñen que adestrar, polo menos, unha ou dúas semanas co resto do equipo. Con todo, dadas as nosas circunstancias actuais, quizá volvan ao equipo antes de tempo», afirmou o técnico holandés.
«Di María e De Gea adestraron hoxe con normalidade e están ao dispor do equipo. Teño que agardar a ver como reacciona Carrick tras o adestramento de mañá, pero confío en que poida xogar o sábado», indicou o preparador holandés.
A comezos de semana, o Manchester United tiña doce xogadores do primeiro persoal lesionados ou en dúbida para o choque deste próximo sábado ante o Arsenal no Emirates Stadium.
Os diaños vermellos, que sumaron catro triunfos, catro empates e tres derrotas en once xornadas de liga, ocupan a sétima posición na 'Premier League', con 16 puntos, a 13 do líder, o Chelsea.