Os «gunners» se impusiron por 3-1 ao West Ham e recuperan o posto de Champions
16 abr 2014 . Actualizado á 13:00 h.O Arsenal derrotou 3-1 ao West Ham no partido aprazado da trixésima cuarta xornada da Premier League e recuperou a última praza que lle permitiría xogar a próxima edición da liga de Campións.
O cadro que adestra o francés Arsene Wenger puido coa presión e seguiu o ronsel do Everton, que a fin de semana derrotou a domicilio ao Sunderland. Os tres puntos que sumou ante o West Ham permiten ao cadro londiniense recuperar a cuarta posición.
Esta semana está a ser moi boa para Wenger. Despois de acadar a final da FA Cup o pasado sábado, mantén unha liña ascendente cunha vitoria importante para os seus intereses na Premier. Para conseguila, tivo que remontar un tanto de Matthew Jarvis, que, a cinco minutos do descanso, asustou ao Arsenal tras unha primeira parte na que ningún equipo dominou con claridade.
Con todo, a alegría durou pouco para o bloque de Sam Allardyce, que non aguantou a súa vantaxe e tres minutos antes do final do primeiro acto recibiu o gol do empate, obra de Lukas Podolski, que aproveitou un gran pase de Santi Cazorla.
A segunda parte foi un monólogo do Arsenal, que dominou os segundos 45 minutos sen dar un respiro ao West Ham. Con ese guión, a película pronto foi acabándose cun final favorable para os pupilos de Wenger, que marcaron o segundo gol por medio do francés Olivier Giroud.
Foi de novo Podolski, a doce minutos do final, quen sentenciou o duelo cun trallazo desde dentro da área. O seu tanto completou un marcador no que brillaron Cazorla e Mikel Arteta. Ambos manexaron á perfección os tempos do Arsenal, que volve ocupar praza de Liga de Campións.