Cos dobretes dos españois, o Chelsea e Arsenal conseguiron a vitoria; o Swansea non podo ante o Norwich
09 dic 2012 . Actualizado á 01:09 h.Fernando Torres, Michu, Mikel Arteta e Juan Mata deron o toque de sabor español á xornada da Premier League inglesa. Os catro xogadores españois marcaron nos seus respectivos partidos, e tres deles fixérono por partida dobre, aínda que con sorte dispar para os seus equipos.
Torres prolongou a súa serie goleadora cun dobrete ante o Sunderland (1-3), o que supuxo a primeira vitoria ligueira do técnico español Rafa Benítez desde a súa chegada ao Chelsea.
Os blues sumaron a súa primeira vitoria no campionato local desde o 20 de outubro e voarán coa confianza reforzada a Xapón, onde o xoves disputarán as semifinais do Mundial de clubs.
Tres días despois de converterse no primeiro campión da liga de Campións en quedar eliminado na fase de grupos, o Chelsea valeuse dun bo primeiro tempo para marcar as diferenzas. Torres, que se reencontrou co gol o mércores ante o Nordsjaelland na liga de Campións despois de máis de 500 minutos de seca, adiantou ao conxunto londiniense no minuto dez.
O dianteiro español aumentou as diferenzas ao fío do descanso ao transformar un penalti e o seu compatriota Juan Mata sentenciou o encontro nada máis renovarse o partido. O Sunderland reaccionou, acurtou distancias por medio de Adam Johnson no minuto 65 e puxo en apertos en varias ocasións ao porteiro checo Petr Cech.
Mentres tanto, Michu cargou de razóns aos axentes futbolísticos. Anotou dous goles máis ante o Norwich. O Swansea perdeu, pero o atacante español engordou os seus números. Acumula doce tantos. É o máximo goleador en solitario da competición con dúas de vantaxe respecto ao holandés Robin Van Persie, do United, e o uruguaio Luis Suárez, do Liverpool, que entran en acción o domingo.
Dous penaltis transformados polo español Mikel Arteta deron os tres puntos ao Arsenal ante o West Bromwich (2-0). O equipo revelación do curso, asentado aínda na parte alta, perde fol ao encaixar no Emirates a súa terceira derrota seguida na Premier.
O triunfo leva á parte alta ao equipo de Arsene Wenger, que xa se coloca sexto, a dous puntos do West Bromwich, quinto, e do Tottenham, cuarto, que o domingo visita ao Everton.