Outro ano máis vai esvaecendo, e, como é habitual, ese ciclo vital conclúe o día 31 de decembro do calendario gregoriano. Esta forma de medir o noso paso polo mundo foi establecida polo papa Gregorio XIII no ano 1582 para corrixir os desaxustes acumulados durante séculos. O sistema baséase no movemento de translación da Terra arredor do Sol, un periplo que marca o ritmo das nosas vidas. Desde aquela, nos países que adoptaron este sistema, o Fin de Ano coincide sempre na mesma data. Porén, o xeito de entender este tránsito non sempre foi o mesmo.
A orixe desta tradición remóntase a épocas remotas, onde a medición do tempo estaba vinculada aos eventos agrícolas e astronómicos. O rexistro máis antigo dunha celebración similar data da antiga Mesopotamia, uns 2.000 anos antes de Cristo. Tratábase do Akitu, unha festividade que marcaba a primeira lúa nova despois do equinoccio de primavera, simbolizando o renacer da natureza. Non obstante, o concepto moderno de Fin de Ano comezou a debuxarse no 46 a. C., cando o emperador romano Xulio César estableceu o calendario xuliano. Baixo o seu mandato, o 1 de xaneiro foi fixado como o inicio do ano en honra a Xano, o deus de dúas faces que mira cara ao pasado e cara ao futuro.
A pesar do avance que supuxo o sistema xuliano, este non contemplaba con exactitude a duración real do ano solar, o que provocou un desvío progresivo de dez días co paso dos séculos. Foi entón cando a reforma gregoriana axustou o cálculo dos anos bisestos, dándolle a precisión que hoxe coñecemos.
Na actualidade, é unha das celebracións máis potentes de Occidente. Alén das uvas ou as badaladas, a Noitevella simboliza un ritual de pasaxe: o peche dun ciclo e a renovación das expectativas de prosperidade. É o momento no que facemos balance do vivido e proxectamos os nosos desexos cara a un tempo novo que agarda, cargado de esperanza, tras a última badalada da medianoite. A min sempre me gustou celebralo en familia e na casa, compartindo mesa, música e conversa coas persoas máis queridas. Iso si, desde hai anos deixei de tomar as uvas; tras a cea, empecei a notar que non me sentaban especialmente ben e, para que comezar o ano con mal corpo?