O festival de Cans acollerá a estrea de «Antes de nós», o filme sobre Castelao
CULTURA
A película, dirixida por Ángeles Huerta, protagonizará a sesión inaugural do certame de cine do Porriño o 22 de maio
03 abr 2025 . Actualizado á 05:00 h.Castelao será un dos referentes na 22.ª edición do Festival de Cans (Porriño), que se celebrará do 20 ao 24 de maio. Ademais de servir de inspiración para conformar o cartel, tamén é o protagonista da película inaugural do certame, Antes de nós. O filme, dirixido por Ángeles Huerta, terá a súa estrea neste festival o 22 de maio, un día antes da súa chegada ás salas de cinema. «Devecemos por ver o debate que pode suscitar. Somos plenamente conscientes de que unha figura como Castelao, sexa cal sexa o ángulo polo que te achegues, vai suscitar polémica. O que si podemos dicir é que nós o fixemos con moita honestidade, con moito amor, con moito respecto, pero hai unha mirada moi feminina/feminista», afirmou a directora este mércores en Santiago, durante a presentación do Festival de Cans xunto a responsables da súa organización, así como a produtora do filme, Zaza Ceballos, e a actriz Cris Iglesias.
A cinta, protagonizada por Xoán Fórneas, Cris Iglesias, Nancho Novo e Miquel Insua, céntrase nos anos novos de Castelao, e nela toma un especial protagonismo Virxinia, a súa muller, representada por Cris Iglesias. A actriz apunta que con este filme se «lle fai xustiza», ao contar un relato xusto, a unha muller que quedou silenciada. Pola súa parte, Zaza Ceballos incidiu no desafío que supón «levar ás pantallas un mito noso».
Castelao estará presente en distintas actividades transversais desta edición do Festival de Cans, segundo anunciou o seu director, Alfonso Pato. Tamén haberá unha lembranza para a «señora Alicia», que faleceu en xaneiro e foi unha das referentes desta cita co cinema abrindo a súa casa ao sétimo arte. Por iso, a súa presenza non podía faltar no cartel deseñado por Pablo Rodríguez, de Rei Zentolo, para esta edición. Xunto á figura de Alicia, e inspirándose nos pequenos ornamentos que Castelao deseñaba para a revista Nós, tamén están reflectidos outros símbolos do festival, como os chimpíns, as proxeccións, o can ou algúns dos concertos no «ghaliñeiro».
Por outra banda, xa se atopan á venda douscentos paquetes para asistir ao festival por só 22 euros ata o 27 de abril, incluíndo entrada, camisola, unha chapa e un catálogo, precisou a presidenta da Asociación Arela, Keka Losada, quen resaltou que o festival medra se os profesionais do audiovisual galego o fan.