John Krasinski demostra como realizador controlar os resortes do susto doado e predicible, con saltos na butaca programados e calculados como un reloxo
23 jun 2021 . Actualizado á 08:53 h.Sufrir en silencio. Iso é o que fan os personaxes -e os espectadores, agradecidos- das dúas películas que supoñen a afortunada incursión na dirección do cine de terror do actor John Krasinski. Lonxe de pomadas milagrosas (como a daquel famoso anuncio que levaba a citada consigna por bandeira), para os protagonistas non parece haber alivio para os seus males, máis aló da prevención que é para eles o silencio… Para todo este sufrimento, Krasinski leou á que é a súa muller fóra das pantallas (unha sempre eficaz Emily Blunt), un par de nenos (ollo á nena con xordeira, Millicent Simmonds, que comparte condición na vida real e que apunta xeitos), un bebé e pouco máis, e sitúaos nun mundo posapocalíptico para que fuxan ante uns alieníxenas con moi malo leite que se guían unicamente polo son, e que aterraron na Terra para exterminar por mero pracer a unha humanidade moi ruidosa.
Un lugar tranquilo tomaba estes ingredientes e construía con eles un drama intimista ao redor da familia, con escasos medios, actores e escenarios, conseguindo con todo un dominio absoluto na creación dun clima de tensión, apoiado especialmente os efectos de son e nas interpretacións (para o recordo, a terrorífica escena de parto). Todo iso afastábao dos filmes de terror da chea, e xeraba unha aceptación en crítica e público que deu pé a esta segunda parte.
Partindo dun listón alto, Un lugar tranquilo 2 ábrese cun prólogo de altura, e desenvólvese dun modo máis que aceptable, aínda que perdese a novidade do seu argumento. Hai máis recursos, e por tanto máis espectáculo, pero por sorte segue dominando a tensión dramática, o suspense e a transmisión de angustia. Si que pode ser máis do mesmo, pero Krasinski demostra controlar os resortes do susto doado e predicible, con saltos na butaca programados e calculados como un reloxo, así como a montaxe paralela (a tres bandas) para sumar estrés. E xa de paso, deixando a porta aberta a unha futura terceira parte.
«A QUIET PLACE: PART 2»
EE.UU., 2020.
Director: John Krasinski.
Intérpretes: Emily Blunt, Cillian Murphy, Millicent Simmonds, Noah Jupe, Djimon Hounsou.
Terror, ciencia ficción.
97 minutos.