Considera que forman parte de un «un todo indivisible»
30 novs 2017 . Actualizado ás 16:35 h.A Audiencia Provincial de Huesca ratificou a sentenza que ordena o regreso a Aragón dos bens do Mosteiro de Sijena por considerar que forman parte de «un todo indivisible» e desestimou os recursos presentados polo Museo Nacional de Arte de Cataluña (MNAC) e a Generalitat catalá para impedir a súa volta. Desta forma, a Audiencia Provincial ratifícase na sentenza ditada polo xulgado de Primeira Instancia e Instrución número 1 de Huesca, que ordenaba a devolución das pezas de arte sacra, segundo informaron fontes xudiciais.
Na súa sentenza, os maxistrados da Audiencia de Huesca reiteran que os bens obxecto do litixio forman parte dun «todo indivisible» e que a adecuada protección do patrimonio cultural «non é compatible coa desintegración dun conxunto monumental».
O Xulgado de Primeira Instancia e Instrución número 1 de Huesca ordenou a devolución destes bens pertencentes ao tesouro artístico do Mosteiro de Sijena, tras anular a venda por parte da Orde San Xoán de Jerusalem á Generalitat catalá en 1983. Tras recibir o requirimento xudicial pola aplicación do artigo 155 da Constitución, o ministro de Educación, Cultura e Deporte, Iñigo Méndez de Vigo, deu orde, este pasado martes, de devolver as 44 pezas ao Mosteiro de Villanueva de Sijena.
Con esta decisión do titular de Educación, Cultura e Deporte acátase unha decisión xudicial, polo que o seu Ministerio procedeu «inmediatamente» a dar instrucións aos órganos competentes do Departament de Cultura da Generalitat de Cataluña.