Eugenio e Margarita, expropiados da casa Carré na Coruña: «Dixéronnos que a van a conservar para facer algo cultural»

O lema Aquí tamén se fala galego naceu no instituto Rafael Dieste da Coruña baixo unha campaña de normalización lingüística. A súa orixe responde o asombro que experimentaron os alumnos do centro ao aprender que a cidade herculina é esencial na historia do galeguismo, e, á vez, ten ese carácter cosmopolita que tamén describe a esta urbe. Testemuña dese pasado é a Casa Carré, que o Concello expropiou aos seus donos por 459.000 euros.

O inmoble foi propiedade de Uxío Carré Alvarellos (1885 -1967), mestre, escritor en lingua galega e membro dunha saga de intelectuais galeguistas que comezou con Uxío Carré Aldao (1859-1932), libreiro, escritor e principal animador da Cova Céltica. Este faladoiro de intelectuais da época, como Manuel Murguía ou Francisco Tettamancy, expresou un sentir que se materializaría no Rexurdimento do noso idioma e no nacemento de institucións como a Real Academia Galega, en 1906. O propio Aldao foi un dos fundadores e tres dos seus fillos, membros: Uxío, o dono da casa expropiada, Leandro e Luis.

De toda esa esfera cultural foi testemuña a casa Margarida, apelativo real do inmoble e que responde o nome da muller de Uxío. Levantouse en 1942 e foi un dos últimos traballos de Rafael González Villar (1887-1941), un dos arquitectos máis importantes da Coruña da primeira metade do século XX, con outras obras como na Coruña a casa Molina ou o edificio onde está o antigo cine Avenida.

Mobclub estrea unha colaboración con Oysho na Coruña: «Para nós é unha satisfacción moi grande»

E.G.

Esta masa intelectual é a que levou ao Concello para expropiar este inmoble. A intención é convertelo nun edificio dotacional que dará servizo ao barrio. «Dixéronnos que van conservar a casa e o xardín para facer algo cultural para a veciñanza», conta a La Voz Eugenio Carré Vega, neto do propietario e actual residente: «Eu agora voume a Vilaboa, máis preto da miña familia. Vou botar en falta, sobre todo, o xardín».

A asociación de veciños Uxío Carré, de Eirís, valoran moi positivamente a decisión do goberno municipal e confían en que a convertan nun «espazo cultural para a veciñanza». Margarita Carré Vega, a outra herdeira, lembra que o seu avó era «moi querido no barrio» porque abría a casa aos nenos da zona e dáballes clases.

Alfredo Vigo Trasancos, catedrático da USC, sinala que é un acerto a decisión. A edificación non só é un dos últimos traballos do arquitecto, senón que o seu deseño «ten unha concepción galeguista, trata de evocar como deberían ser as casas de campo galegas».

---

---

---