Pretende reformar os centros de Nogueira, Folgoso e Cruces
01 jun 2023 . Actualizado á 05:00 h.Sobrado ten a intención de transformar as antigas escolas infantís. O alcalde, o socialista Lisardo Santos, considera que estes inmobles son unha boa opción para fortalecer o tecido asociativo, mellorar e sumar novos espazos para o uso da veciñanza, que é unha dos obxectivos que se marca para este mandato, tras lograr a reelección nas municipais do 28M.
Trátase dunha premisa que Santos agarda cumprir co reacondicionamiento das antigas escolas infantís, reconverténdoas en locais sociais.
A intención do rexedor de Sobrado é realizar estas intervencións en tres centros, os de Nogueira, Folgoso e Cruces.
Para pór estas instalacións ao dispor dos veciños, o Concello planea o reacondicionamiento total dos edificios que foran empregados como centros de ensino e que, na actualidade, atópanse en desuso. Supón darlles unha nova vida tras unha transformación, que consideran necesaria.
Zonas de reunión
«Un dos nosos propósitos é fortalecer e estimular o movemento asociativo, polo que consideramos fundamental incrementar este tipo de espazos, favorecendo que as asociacións veciñais teñan un lugar onde reunirse ou onde levar a cabo actividades», explica Santos.
As obras consistirán na reforma das edificacións existentes. Para darlles unha nova vida, acometerase a mellora da impermeabilidade das súas cubertas e das súas fachadas, a instalación de novas carpinterías, a dotación de servizos de electricidade e telecomunicacións, así como actuacións en fontanería, auga quente, ventilación, saneamento e calefacción, ademais da colocación de portas.