Abeleira, un gastrobar no Temple onde a tradición coquetea coa cociña actual e internacional

No Mesón A Cepa aprenderon de primeira man o que é a hostalería e a cociña tradicional antes de embarcarse no 2018 nun novo proxecto, Abeleira, un gastrobar onde a cociña de sempre coquetea con propostas máis modernas e internacionais. «Todo é caseiro, produto fresco e de calidade. Ese é o noso selo de calidade», resume Javier Blanco , á fronte xunto á súa irmá Anabel deste acolledor e moderno local situado en plena costa da Tapia (Cambre) e que loce con orgullo o distintivo Q de Calidade Turística.

Os que optan polos sabores de toda a vida teñen na ensaladilla, as croquetas —hainas de xamón ibérico e tamén de marisco— e o raxo tres opcións coas que satisfacer gratamente os seus padais. Hai outras propostas, como as rabas con maionesa de kimchee , ou a lura con maionesa de cítricos, que non deixan de ser esa cociña de sempre, pero renovada con acerto.

Na carta hai cabida tamén para pratos que invitan a voar cara a outras latitudes como o nasi goreng, un arroz típico da cociña indonesia que aquí preparan salteado con gambón, pito, verduras e soia, ou as gyozas, unhas empanadillas xaponesas que se cociñan ao vapor, que en Abeleira enchen cun delicioso estofado de carrilleras con verduras. «A xente nova adoita ser máis atrevida para probar cousas novas, pero sempre hai sorpresas», recoñece o propietario. Nesta liña actual e viaxeira tamén están as fajitas de pito con guacamole e nachos, practicamente un fixo das mesas nas que se comparten pratos ao centro, o bao de costela de porco ou os tacos —de pulled pork e cochinita pibil—.

As hamburguesas son outro dos seus grandes reclamos e a estrela é a que leva o seu nome. Prepárase con tenreira galega e complétase con cebola caramelizada, queixo San Simón, bacon e tomate confitado. Un bocado suculento. Tamén teñen pizzas con combinacións de ingredientes algo atípicas, pero deliciosas, como a de lagostinos, cogomelos e touciño entrefebrado ou a de roxóns, piquillos e queixo de Arzúa.

Contan ademais con repostería artesanal que elaboran no seu propio obrador e que serve de broche perfecto en calquera visita, xa sexa para almorzar, comer ou cear. Os máis golosos gozarán coa carrot cake ou a de chocolate e Nutella, pero a mousse de limón con crumble e lemon curd, fará as delicias dos que buscan un toque cítrico e de frescor nos seus peches. Teñen un menú do día en grao sumo variado que serven tamén a domicilio e, con tempo, pódese encargar calquera das súas tortas para recoller e gozar en casa. 

---

---

---