Un mural na escola infantil Luís Seoane rinde homenaxe na Coruña ás cantareiras Rosa e Adolfina Casás
A CORUÑA CIUDAD
A directora do centro é neta e sobriña neta das dúas mulleres ás que se lles rende tributo
19 may 2025 . Actualizado á 12:53 h.A emoción apoderouse este venres da comunidade educativa da Escola Infantil Municipal (EIM) Luís Seoane, en Monte Alto, durante o acto de homenaxe a Rosa Casás e Adolfina Casás, dúas cantareiras que reciben un tributo en forma de mural nunha das paredes do centro. A iniciativa partiu do Servizo Municipal de Educación do Concello da Coruña, pero resultou especialmente emotiva para Felicidad Casás, traballadora da escola, neta de Rosa e sobriña neta de Adolfina.
«Son neta de Rosa Casás e sobriña neta de Adolfina Casás. As dúas homenaxeadas este ano como cantareiras das Letras Galegas», explicou con emoción Felicidad, quen subliñou que este ano viviu o proxecto «dun xeito moi especial» polo seu dobre vínculo familiar e profesional: «Tócame traballar a min e á miña familia en torno a algo moi emotivo».
O mural, realizado pola artista Tania Solla coa colaboración da editorial Polo Correo do Vento, foi posible grazas ao impulso do propio equipo docente do centro. «Queríamos facer algo nesa parede e este ano pareceunos perfecto dedicárllelo ás cantareiras da nosa familia», explicou Casás. A intervención artística foi tamén un proceso participativo para o alumnado: «Os nenos estiveron vendo como Tania pintaba, estiveron vendo todo o proceso de creación do mural».
A idea de recuperar a figura de Rosa e Adolfina Casás partiu do curmán de Felicidad, Richie Casás, músico, que «empezou a recopilar todo aquilo que non se recollera» sobre as cantareiras. O mural dá agora visibilidade ao seu legado. «Porque a base do crecemento de cada un tamén é saber de onde vimos para saber a onde imos», concluíu Felicidad Casás.
No acto de inauguración estivo presente a alcaldesa da Coruña, Inés Rey, quen explicou a importancia de que os nenos de idades tan temperás, de 0 a 3 anos, xa teñan unha vinculación coa cultura e co idioma galego: «É probable que os cativos non sexan conscientes do que imos facer, pero é importante que este tipo de actos nos que se reivindica a nosa cultura e as nosas mulleres se fagan aquí, en centros educativos, e que escoiten a nosa lingua». Explicou tamén que as cantareiras estiveron invisibilizadas durante décadas a pesar de seren transmisoras culturais. O seu legado estará agora reflectido nun mural e tamén cunha placa conmemorativa que se instalará proximamente no número 22 da rúa Alcalde Lens, onde ambas mulleres viviron durante unha época antes de volver á súa Cerceda natal.
Tamén estivo presente no acto María Dolores Sánchez Palomino, catedrática de Filoloxía Románica da UDC e membro da Real Academia Galega (RAG), quen incidiu na importancia de «achegar a cultura galega a nenos tan pequenos, porque eles son o porvir. Neles está o futuro e o mantemento da nosa cultura», asegurou.