A Policía Local clausurou o local do Orzán por carecer de licenza. Os axentes incautáronse de drogas e armas brancas tras rexistrar a varios clientes.
26 abr 2024 . Actualizado ás 12:32 h.A Policía Local acudiu ás sete da mañá deste venres a lpub O Museo, situado no Orzán da Coruña. Os axentes realizaron un rexistro no negocio, que estaba aberto, e na súa intervención realizaron un cacheo aos clientes que estaban dentro do local. A operación saldouse coa incautación de drogas e armas brancas.
Na operación participaron máis dunha ducia de axentes de paisano e uniformados. Desaloxaron o local e sacaron aos clientes, aos que foron cacheado no exterior. A algúns deulles tempo a desfacerse de varias doses de cocaína, que guindaron á estada onde se produciu un apuñalamento hai unha semana.
Despois do rexistro, os axentes procederon a clausurar o negocio por carecer de licenza para a actividade que estaba a realizar como establecemento hostaleiro. O rexistro produciuse despois de que veciños e comerciantes da rúa Orzán denunciasen que baixo as súas vivendas funcionan tres pubs ata altas horas da mañá. Os residentes na zona sinalan que os negocios son foco de conflitos noite si e noite tamén.
Fronte a un deles, á altura do número 20 da rúa, produciuse o pasado venres o ataque brutal a un home por parte de 4 individuos que hoxe xa están en prisión. Foi o límite. Tras o suceso, os veciños alzaron aínda máis a voz pedindo ás autoridades que inspeccionasen estes negocios, as súas licenzas e o historial da súa clientela. Incluso os hostaleiros da zona que cumpren a legalidade tiveron pensado unha reunión no Concello da Coruña para alertar do dano que lle estaban causando eses pubs á imaxe da zona.