A revista especializada europea Metal Hammer enxalzou o seu álbum «Acclaim the Machine»
31 oct 2025 . Actualizado á 11:54 h.Sickeeper, unha banda de metal alternativo de Betanzos, publicou un segundo álbum que acaba de ser recoñecido pola revista especializada europea Metal Hammer como un dos «20 lanzamentos imprescindibles do metal español» no primeiro semestre deste ano. O disco, editado por RockCD Marcas, titúlase Acclaim the Machine e foi publicado en marzo deste ano.
Deste xeito, Sickeeper celebra o seu décimo aniversario cun laureado recoñecemento ao ser incluído xunto a bandas consagradas como Hamlet, Etxale Apio, Ravenblood, Ciconia ou The Cost. «Os galegos Sickeeper aumentan a súa contundencia con Acclaim the Machine, no seu segundo álbum de estudo. Un traballo conceptual que nos expón a cara negativa das novas tecnoloxías, simbolizado coa araña da súa portada que representa a IA que todo o atrapa. Unha aposta por riffs demoledores e voces con melodías pegadizas nun álbum de metal moderno, cargado de enerxía e cunha produción puída ao detalle. Ideal para os seguidores da nova onda de metal alternativo», recolle a publicación.
Traducido como gardián enfermo, Sickeeper está formado por Lucas Blanco (guitarra e voz), Iván Vázquez (baixo), Martín Salamini (teclista) e Jairo Moreno (batería).
De momento non haberá xira deste segundo disco xa que os músicos están a traballar na gravación do terceiro. «Estamos a compor temas novos, adoitamos facer uns 30 e logo quedámonos con 8 ou 9», sinala Lucas Blanco.