Inspirado na filosofía danesa do benestar, Antonio León abriu este espazo vistas á praia de Riazor, no que se traballa con máquinas para lograr «o benestar e a saúde» das persoas que o practican
02 ago 2025 . Actualizado á 11:08 h.Antonio León é do Perú e foi nadador desde os 6 ata os 18 anos. Un dos seus adestradores sacouno da auga e descubriulle o pilates como unha forma de mellorar a súa condición física. Mudouse a Santiago de Compostela para estudar a carreira de psicoloxía e aquí, en Galicia, e tratou de buscar un centro de pilates similar, no que traballasen co método clásico, con máquinas, pero nese momento non o atopou. «Vin a oportunidade e pensei que algún día gustaríame ter un estudo de pilates». Empezou primeiro en Santiago, cun estudo «con catro colchóns de Decathlon» e así ata hoxe. Ten un centro na capital galega, outro en Vigo e un último estudo na Coruña, Hygge Pilates Coruña, no número 33 da avenida Pedro Barrié de la Maza, nunha entreplanta cunha das mellores vistas da cidade: aquí podes practicar pilates con vistas á praia de Riazor.
Co mar de fondo é máis doado motivarse para porse os leggins e baixar a facer pilates. «Aquí tratamos de motivar», conta Antonio, que recoñece que «ir a un espazo con estas vistas apetece máis que ir a un espazo pechado». O seu obxectivo é lograr o benestar e a saúde das persoas que acoden ao seu estudo e, sobre todo, que cale nelas a importancia de facer exercicio: «Somos moi conscientes de que o noso papel non só está en ensinar a facer exercicios, se non en que a persoa se adhira á actividade física. A idea de crear un estudo con vistas ao mar non é só para dar unha boa técnica, senón ter un espazo ao que che apeteza vir».
O estudo está pensado ao milímetro: o chan lembra á cor da area e as luces do teito fúndense co azul do mar. O espazo leva o nome dunha palabra danesa, hygge, que fai referencia ás cousas que nos rodean que nos fan felices. Inspirados nesa idea de benestar abriron Hygge Pilates Coruña. Antonio explica ningún dos seus beneficios: «Aquí a idea é traballar o corpo como un todo. Dentro do método pilates hai principios onde nós ensinamos a respiración, o centro, o control a fluidez ou a estabilidade. Todos eses conceptos son claves dentro da execución do exercicio e coas máquinas conseguimos, por unha banda, que nos asistan nalgúns movementos cando estamos a empezar a aprender ou que nos resistan cando xa imos progresando e temos esa aprendizaxe de control motor». As vistas ao mar fan o resto.