O custo final da terminal de buses e os elementos comúns da intermodal da Coruña sobe a 45,3 millóns

O Boletín Oficial do Estado (BOE) publicou este xoves a addenda número 2 ao convenio para a construción da estación intermodal subscribido entre o Administrador de Infraestruturas Ferroviarias (ADIF), a Xunta e o Concello. O acordo céntrase na execución da terminal de autobuses, o aparcadoiro subterráneo e os elementos comúns da futura infraestrutura. O custo total desta parte dos traballos —na que non están incluídos os que abarcan a parte ferroviaria que executa por separado o ADIF— elévase ata 45,3 millóns de euros, o que supoñen 2,5 máis do estipulado inicialmente.

O motivo principal deste aumento, no que xa están realizados os axustes económicos previstos pola proximidade do final das obras, foi a solicitude do ADIF de incrementar o número de prazas de aparcadoiro no subterráneo que haberá baixo ao terminal de autobuses. Deste xeito, dos 300 espazos para aparcar previstos nun principio pasouse a 550.

A maior parte do sobrecusto foi asumido directamente polo ADIF como consecuencia de ser o impulsor desta modificación do proxecto orixinal. A parte que correspondía ao Concello, ao redor de 10.000 euros, viuse compensada coa baixa económica durante a adxudicación das obras e a liquidación do proxecto. Este cambio recibiu o visto e prace por unanimidade da corporación municipal durante o pleno do pasado mes de decembro. 

Recta final da nova estación

A Xunta completou en febreiro as obras da terminal de autobuses e a súa apertura ao público depende da reorganización das rutas e do sistema de accesos, no que traballan conxuntamente a Xunta e o Concello.

O ADIF indicou que a conclusión dos traballos na parte ferroviaria, previsto para xuño, atrasarase ata finais de ano. Mentres, o Concello prevé abrir esta primavera a obra dos accesos na parte da avenida de Arteixo, que conectará coa da Sardiñeira, punto polo que accederán os buses.

---

---

---