Deteñen o responsable de Protección Civil de Culleredo por supostos malos tratos

O presidente da Agrupación de Voluntarios de Protección Civil de Culleredo foi detido a semana pasada pola Garda Civil acusado dun presunto delito de violencia machista dentro do ámbito familiar. A detención produciuse o pasado xoves, tras a denuncia duns feitos que ocorrerían dous días antes.

Segundo fontes próximas á investigación, a presunta agresión non foi comunicada directamente pola suposta vítima, senón que a muller, tamén voluntaria na mesma agrupación de Protección Civil, comentou a situación a unha compañeira. Foi esta última quen, ante a gravidade do relato, decidiu informar os seus superiores, que posteriormente puxeron os feitos en coñecemento da Garda Civil.

Unha vez que os gardas do posto de Culleredo levaron a cabo a detención e tras pasar a disposición xudicial, o xuíz decretou para o home unha orde de afastamento de 200 metros respecto á vítima, como medida cautelar para garantir a súa seguridade.

Polo momento, o caso continúa baixo investigación e agarda que se practiquen novas dilixencias para determinar con precisión as circunstancias do presunto episodio de malos tratos.

---

---

---