Sentenza contra a CIG por mentir sobre o despedimento de Ibrahima e N'Diaye

O Tribunal de Instancia de Betanzos condenou á Confederación Intersindical Galega (CIG) pola intromisión ilexítima no dereito á honra á empresa Puertas Betanzos. Esta firma contratara a Ibrahima Diack e Magatte N'Diaye, os dous senegaleses que defenderon a Samuel Luiz na malleira que acabou coa súa vida na Coruña, un acto polo que foron nomeados fillos adoptivos da cidade.

O empresario contratou a ambos para a súa planta de Oza-Cesuras e a relación contractual rematou a finais do 2022. A CIG emitiu entón un comunicado acusando á empresa de obrigarlles a facer máis horas que ao resto de traballadores e de despedilos por marcharse de vacacións ao seu país. «Un día antes de saír os voos, dende a empresa trataron de convencelos para que renunciaran ás vacacións, algo ao que estes se negaron para emprender, en efecto, a viaxe prevista durante as súas vacacións pendentes. En represalia, ese mesmo día foron despedidos con cadansúa carta por "causas económicas", sendo substituídos de inmediato nos seus postos por novos operarios, e non aboándolles nin sequera a indemnización nin a liquidación salarial», indicaron desde o sindicato.

Pero a empresa denunciou á CIG por difundir acusacións falsas. E no xuízo celebrado en Betanzos decaéronse boa parte dos argumentos do sindicato, incluso polos propios testemuños de Ibrahima e N'Diaye. «Os traballadores que foron despedidos non indicaron ao responsable da CIG o recolleito na nota de prensa, non sabían o motivo do despedimento e por tanto non asóciano ás vacacións de forma inequívoca, non foron forzados a renunciar ás vacacións e non sabían a causa do despedimento», recolle a sentenza. Do que si se queixaban é que facían máis horas que os seus compañeiros, que tiñan problemas para trasladarse ao traballo, pero non criticaron o salario, nin a indemnización nin a liquidación salarial. Apuntan que tras o despedimento lles chegou un diñeiro pero descoñecen «se era a liquidación ou non».

Durante o xuízo a empresa probou a falta de veracidade da nota de prensa, xa que foi a propia compaña a que adquiriu os billetes, ao que se engade a circunstancia de que Puertas Betanzos «pecha durante esas datas para dar vacacións a todos os seus traballadores».

Con todo iso, o xuíz aprecia a existencia dunha vulneración ao dereito á honra con respecto á nota de prensa da CIG publicada en diferentes medios. «Non concorre o elemento de veracidade da información e non pode afirmarse que exista algún erro, salvo a duración da xornada laboral», reza o fallo.

A indemnización, a unha oenegué

Puertas Betanzos solicitara unha indemnización de 12.000 euros, que o tribunal deixa en 3.000, considerándoa igualmente importante e non simbólica. E obriga á CIG para facer pública a sentenza a través da súa páxina web. Concluído o prazo de apelación, o sindicato non fixo uso deste e a sentenza é firme. Puertas Betanzos anunciou que doará os 3.000 euros a unha oenegué.

---

---

---