Este luns comezarán a retirar a zona axardinada da vía entre o Teatro Colón e o Obelisco
16 mar 2025 . Actualizado á 05:00 h.O Concello da Coruña avanza no inicio das obras de reurbanización dos Cantóns, a fase cero da transformación da fachada marítima da cidade. Esta semana iniciáronse os traballos previos co balizamento das zonas iniciais de actuación, o marcado dos servizos e a instalación das primeiras casetas e valados de obra. Será este luns, día 17 de marzo, cando aparezan as primeiras máquinas pesadas para a demolición dun tramo de medianeira existente.
Un carril por sentido
Desde o goberno local explicaron que este é un paso máis «na folla de ruta preliminar», coa retirada progresiva da medianeira axardinada existente no tramo entre o Obelisco e o Teatro Colón. Unha intervención necesaria «para facilitar os traballos posteriores e tamén para delimitar os espazos de paso de tráfico rodado no desenvolvemento das obras». Confirman que desde este luns, así como nos días posteriores, procederase tamén ao pintado en amarelo e á instalación da sinalización que especificará as zonas de obra. «Manterase un carril por sentido para o paso do tráfico rodado. A demolición da medianeira é fundamental neste contexto, xa que tras a súa retirada, e co aglomerado reposto, será posible recolocar os carrís, cando sexa necesario, para o paso de vehículos nas diversas fases de execución», indicaron.
A alcaldesa, Inés Rey, recalcou que nos próximos días, tal e como avanzou o goberno local esta semana, «haberá encontros sectoriais para informar ao detalle da planificación prevista de cara aos próximos meses, co obxectivo de solucionar as dúbidas e consultas que poidan xurdir», por exemplo, en termos de mobilidade, transporte e alteracións no tráfico. «Que tentaremos minimizar na medida do posible», asegurou.
Sector comercial e veciñal
Esta mesma semana, veciños e comerciantes da zona manifestaron, precisamente, a falta de diálogo co goberno local sobre este proxecto. De feito, desde a Asociación Obelisco confirmaban que non tiveran ningún encontro cos responsables municipais para analizar o novo deseño nin a repercusión que terá no sector comercial. Reclamaban, entre outras cousas, que se presentase aos afectados un plan alternativo de transporte, dado que, dunha forma ou outra, o corte dos cantóns ao tráfico terá consecuencias na chegada de clientes ou público a esta zona de compras. Tamén pedían que, antes de abordar os traballos, expuxésense outras necesidades urbanas, como unha mellor accesibilidade aos aparcadoiros soterrados (en concreto para as persoas con mobilidade reducida ou con carros infantís) así como un plan de reforzo na liña de buses. O Concello avanza agora que queren dar resposta a estas necesidades.
Vinte meses de traballos, «sempre que as condicións meteorolóxicas así o faciliten»
A intervención nos Cantóns contará cun investimento enteiramente municipal de case 7 millóns de euros, co obxectivo de remodelar e ampliar os espazos peonís entre Juana de Vega e a sede da Autoridade Portuaria. Ademais, inclúe unha completa transformación de Entrejardines. Desde o goberno local precisaron que o prazo de execución está marcado en vinte meses, «sempre e cando as condicións meteorolóxicas así o faciliten».
A ampliación dos espazos peonís sumarase a outras actuacións, como a nova bancada que se habilitará sobre o aparcadoiro dos Cantóns, un enclave concibido como un futuro punto de encontro e reunións para a cidadanía.
Ampliación do carril bici
Ademais, aproveitando a intervención, o Concello mellorará e ampliará o carril bici que bordea os xardíns de Méndez Núñez para que pase a ser bidireccional, conectándoo co novo percorrido xa habilitado entre Rúa Nova e o paseo marítimo do Orzán, sendo este último o primeiro tramo que atravesa o istmo de Peixaría.
Por outra banda, tamén se acometerá a peonalización de Entrejardines, unha iniciativa enmarcada no plan de recuperación da fachada marítima. Así, os xardíns de Méndez Núñez volverán estar unidos, cunha continuidade peonil entre os seus espazos naturais e a chaira contigua ao palco da música. Esta parada, incluídas as marquesiñas, trasladarase a Alcalde Manuel Casás, onda Correos. As paradas de taxis do Cantón Grande e Correos conservaranse e a carga e descarga concentrarase en Durán Loriga.