Álex Ortiz, adestrador do CD Lugo: «Se que fixemos cousas ben, pero tamén cousas mal»
CDLUGO
O adestrador albivermello só quedou satisfeito da imaxe que mostraron os seus ata o minuto 25
05 abr 2026 . Actualizado á 21:50 h.O adestrador do Lugo, Álex Ortiz, que encaixou a súa primeira derrota a cargo do equipo nesta a súa segunda etapa, lamentou o resultado. Analizou os erros dos seus e afirmou que tocará corrixilos para afrontar con todas as garantías o derbi do Couto o vindeiro sábado ás catro e cuarto da tarde ante o Ourense CF. «Ata o minuto 25 ou 30 gustoume a idea que expuxeramos. A partir de aí non estivemos acertados de facer o que tiñamos previsto. A responsabilidade é miña, porque eu son o que fai a formulación e os cambios», comentou Álex Ortiz.
Dentro do frouxo que estivo o Lugo, o adestrador extraeu algunhas cousas positivas, así como cuestións a mellorar. «Sei que fixemos cousas ben, pero tamén moitas cousas mal que debemos de mellorar. Queriamos gañar a primeira liña con ese central libre e, a partir de aí, con Pere e Pastrana acumular a moita xente dentro para atopar asociacións en banda para chegar á área con moita xente», engadiu.
«Durante 90 minutos cométense erros, o rival tamén. Tiñamos que xerar moitas máis ocasións das que xeramos. Tivemos ocasións, pero non as metemos. Eles estiveron acertados. Isto é fútbol», indicou Ortiz.
O preparador albivermello explicou o que lle ocorreu ao seu equipo na segunda entrega. «Na segunda metade partímonos completamente. Houbo xogadores que se incorporaban co afán para abrir o marcador. Faltounos orde no terreo de xogo, sobre todo en momentos de perdas de balón. Necesitabamos minimizar esas perdas de balón para que non puidesen transitar, porque esa era a súa maior virtude. Tiñamos que xerar máis ocasións das que xeramos tamén», dixo.
Álex Ortiz recoñeceu que a derrota deste domingo ante o Osasuna Promesas foi unha oportunidade perdida de achegarse á terceira posición da táboa clasificatoria do grupo primeiro da Primeira Federación. «A todos gustaríanos meternos no play off, pero isto é fútbol e non vai do que queres, nin sequera do que mereces», puntualizou.
O técnico lamentou o que ocorreu na última xogada. «Eles na xogada final quizá non tiñamos que sumar tanta xente ao ataque. Eles transitaron e non fomos capaces de xogar esta xogada. Perdemos unha oportunidade pero está todo moi preto».
«Temos que dicirlles á afección que os primeiros decepcionados somos nós. Durante o partido non pararon de animarnos e iso agradecémosllo, pero mañá xa traballaremos duro para cambiar o sabor amargo co que nos imos a casa», dixo.