Nos 11 derbis galegos disputados en Primeira Federación sumou só tres vitorias e encaixou o dobre de goles que os anotados
23 abr 2025 . Actualizado á 22:40 h.A nova xornada de Primeira Federación sitúa ao Club Deportivo Lugo ante un escenario de poucos bos recordos desde a súa caída á categoría de bronce do fútbol español. O sábado (19 horas, Espiñedo, TVG2) o Arenteiro agarda para un novo derbi galego, o último da tempada para un conxunto albivermello que presenta unha amarga bagaxe neste tipo de enfrontamentos nas dúas últimos tempadas. Dos 33 puntos que puxo en xogo fronte a equipos veciños, só un terzo foron parar á súa cuadrícula, guindando ademais un desolador déficit de goles: 20 en contra por só 10 a favor.
O curso pasado todo foron derrotas nos encontros de rivalidade irmandiña ata o último da serie. Como agora, o Lugo pechou o ciclo de derbis no fortín do Arenteiro e impúxose por 1-3. Era a xornada 35 e o conxunto que entón dirixía Roberto Trashorras remontou o tanto inicial de Manín (min 12) cos tantos anotados por Andrés Castrín (min 65), Nacho Quintana (min 77) e Bernardo Cruz (min 86). Tamén con Trashorras ao temón, a escuadra albivermella perdera por 4-1 nas súas visitas ao Deportivo e a Celta Fortuna. Con Paulo Alves sucumbiu (0-1) na casa ante filial céltico, e con Pedro Munitis sufriu os reveses no Anxo Carro ante o Dépor (0-3) e o Arenteiro (0-1).
Algo mellor fóronlle as cousas aos branquivermellos esta tempada nos duelos con equipos veciños. Con Lolo Escobar no banco impuxéronse por 1-0 á Celta Fortuna, empataron na casa co Arenteiro (1-1) e encaixaron unha cruel derrota no Couto (2-1) fronte ao Ourense CF. Con Toni Seligrat, unha de cal e outra de area: triunfo moi valioso en Balaídos (1-2) e dolorosa derrota (0-2) no Anxo Carro ante o equipo ourensanista.
«O Arenteiro trata ben o balón, seguro que nos porá as cousas difíciles»
O Lugo renovou onte o traballo con vistas ao importante compromiso do sábado en Carballiño que afrontará con ilusións renovadas tras o seu traballado triunfo na pasada xornada ante a Real Sociedade B. «A vitoria do outro día foi súpers importante, máis que necesaria. Refórzanos aínda máis para afrontar o que queda de tempada porque agora mesmo dependemos de nós mesmos», destacou Raúl Hernández na sala de prensa antes da nova sesión de traballo.
«Temos ao Arenteiro a un punto e imos alí a afrontalo coa máxima dificultade e con ganas de sacar cousas boas», engadiu o atacante albivermello, decisivo ante a Real B co seu gol, e seguro de que lles agarda un partido áspero a pesar de a mala serie do Arenteiro: «Aínda que ultimamente lle está custando facer goles e sumar, é un equipo que trata ben o balón e seguro que nos porá as cousas difíciles. Temos que igualarlles en intensidade e ganas, que se vexa que somos nós os que nos queremos levar o partido e facelo ver desde o primeiro minuto».
Salvo sorpresa, Hernández volverá ser a referencia ofensiva. «O outro día tocoume xogar de dianteiro e sentinme ben. Sempre estou preparado para momentos así», sentenciou.