O centrocampista do Lugo agarda un partido complicado ante o pechacancelas
16 nov 2023 . Actualizado á 19:33 h.Sen confianzas. O persoal do Lugo non se fía para nada da situación que atravesa o seu próximo rival, o Sabadell, na táboa clasificatoria —é pechacancelas, con tan só 7 puntos—. O domingo (16.00 horas), os futbolistas do Lugo visitarán o cadro catalán coma se se tratase dun rival directo.
O centrocampista albivermello, Jozabed Sánchez, avisa. «A situación do Sabadell é enganosa, o míster púxonos en alerta. Non podes fixarte só na táboa, o fútbol dáche unha cura de humildade. Teñen menos puntos dos merecidos, están a facer máis cousas das que parece», comentou o futbolista do Lugo.
Jozabed agarda un partido «complicado», tendo en conta a necesidade que teñen os arlequinados. «Seguro que sairán cun punto máis de intensidade. A min tocoume estar nesa situación e cambia moito a cousa. A pesar de iso, non nos ten que distraer nada, hai que xogar coa humildade que require a competición», engadiu.
O xogador do Lugo sinala que teñen claro o que hai que facer para dobregar ao pechacancelas. «Iremos co noso plan de partido. Tense en conta ao rival, claro, pero debemos facer o partido que nos interese. Coa nosa presión alta, e coas situacións que mellor se adapten a nós. Será un encontro complexo, seguro», puntualizou.
Borrón e conta nova
Os xogadores albivermellos xa pasaron páxina con respecto ao partido que perderon a pasada fin de semana ante a Cultural Leonesa. Sobre ese encontro tamén falou Jozabed. «Do último partido sacamos en claro que o equipo saíu moi ben, xerando cousas en campo rival, pero que pequenas malas decisións e interpretacións non nos permitiron aproveitar o momento. Na primeira parte non tiveron opción», indicou.
O centrocampista fixo fincapé no tanto que encaixaron, que acabou por penalizalos. «O gol fíxonos dano, eles exhibiron unha eficacia tremenda. Pero cada partido é unha historia diferente, en Salamanca logramos sobrepornos. Debemos ter esa tranquilidade necesaria, sen perder a compostura», admitiu.
Neste apartado, Jozabed coincide coa opinión do seu adestrador. Pedro Munitis comentou á conclusión do encontro ante a escuadra leonesa que aos seus xogadores lles había faltado madurez. «Eles xestionaron posesións que nos dificultaron o roubo. Hai que manter a calma, os partidos son longos, coas nosas armas seremos capaces de dar a volta a calquera resultado», asegurou.
O albivermello confía en que situacións como as do pasado domingo non se repitan. E xa toca aplicar todas estas correccións en Sabadell.
Morgado sofre unha distensión con irregularidade fibrilar a nivel de bíceps femoral
O defensa do Lugo, César Morgado, que se lesionou no partido do pasado domingo ante a Cultural Leonesa, sofre unha distensión con irregularidade fibrilar a nivel de bíceps femoral dereito. Así o confirmaron desde o club lucense.
O central catalán, que participou nos doce partidos disputados na liga da Primeira Federación, xa se atopa baixo supervisión e tratamento do departamento médico do Lugo, e a súa volta ao equipo dependerá da súa evolución.
O albivermello ve o seu equipo con opcións de eliminar ao Mirandés
Jozabed tamén valorou o cruzamento de Copa que o CD Lugo disputará o 6 de decembro no estadio Ángel Carro ante o Mirandés. «O cruzamento de Copa será un partido complexo, ante un equipo mozo, de moito talento, que o está facendo ben nos últimos anos. Será unha eliminatoria bonita», sinalou.
O futbolista albivermello asegura que o obxectivo é pasar. «Trataremos de competir do mellor xeito posible para pasar a eliminatoria», conclúe Jozabed.