O holandés Hugo Oskam lembra as seis semanas que pasou en Muxía, con moita axuda dos veciños
15 mares 2024 . Actualizado ás 20:40 h.Estes días, na chaira do peirao de Muxía , está estacionada unha autocaravana que a moitos veciños lle resultará familiar, e ademais traeralle recordos do confinamento polo coronavirus, que empezou tal día como hoxe fai catros. Era domingo, e todo se detivo. Xusto no mesmo lugar onde se atopa aparcado, Hugo Oskam, un holandés que agora ten 72 anos, pasou seis semanas a partir de marzo do 2020, porque chegou a Muxía xusto cando comezaba aquel cambio tan brutal.
«Na pandemia estiven só na miña caravana e co meu can», lembraba onte, en véspera do aniversario do arranque. Desde entón, esta é a segunda vez que regresa á localidade, que tanto lle gustou entón. «Nada cambiou, e estou no lugar exacto no que estaba entón», explicaba onte. Fai catro anos, a pesar de que os controis de seguridade nas estradas xa comezaran, chegou sen problemas a Muxía. Só saía do seu vehículo coa súa mascota cando estaba permitido.
Lembra que «as primeiras tres semanas estaba todo totalmente pechado», así que paseaba nos momentos permitidos e acudía ao supermercado, pouco máis. «A xente era moi amable. Había veciños que me daban froita, laranxas, e os pescadores traíanme peixe», lembra. Non ten a sensación de pasalo mal naqueles días. Non se contaxiou de covid naquel momento, pero si máis tarde. «Pilleino o ano pasado», indica. Como entón, di que Muxía é un bo lugar para estar un tempo: «É unha localidade pequena, agradable, co seu porto de pescadores, e gústame». O seu autocaravana xa é veterana, trinta anos, pero con poucos quilómetros para os que podería ter neste tempo: 180.000. Antes de chegar a Muxía, esta semana, Hugo estivo visitando algunhas localidades de Portugal .