Encher agora implica desprazarse ata Baio ou Ponteceso. É un servizo demandado por veciños e turistas
14 jun 2025 . Actualizado á 05:00 h.Fai un par de meses, a xerencia decidiu botar o peche á emblemática e única gasolineira con sede social en Laxe. A estación de servizo, pertencente ao Grupo Petronor, era moi importante para os residentes (uns tres mil veciños), pero tamén para as persoas que gozan das vacacións neste municipio bergantiñán eminentemente turístico. De feito, esta gasolineira era moi demandada polos centos de autocaravanistas que, cada ano, acoden á localidade, sobre todo amantes dos deportes náuticos, para encher, pero tamén para desfacerse das augas grises e repor auga nos depósitos.
Desde o Concello laxense apuntaron que houbo un intento por mediar entre algúns interesados en facerse coas rendas do negocio e os actuais propietarios, pero a data de hoxe segue sen haber acordo debido ás diferenzas entre as cifras demandadas e as ofertadas. E é que a guerra de prezos imperante no sector reduciron notablemente as marxes comerciais dos autónomos.
O verán está aí, ao virar a esquina, e se nada o remedia os que queiran encher terán que facelo nas máis próximas, situadas Baio ou en Ponteceso, a dez e once quilómetros, respectivamente de Laxe. A estación de servizo laxense púxose en marcha no ano 1989, coincidindo coa inauguración doutra en Cances (Carballo), que xa pechou hai anos.