O detido por apuñalar a unha muller na Coruña avisou da morte á súa exparella, que alertou ao 112
A CORUÑA CIUDAD
A vítima figuraba no sistema VioGén. Este luns haberá concentracións veciñais para mostrar a repulsta ante este crime
16 jun 2025 . Actualizado á 10:17 h.Efectivos da Policía Nacional acudiron de urxencia este domingo á rúa San Isidoro, no barrio da Sagrada Familia, na Coruña. O motivo: un presunto crime de violencia machista cuxas circunstancias se seguen investigando. «Activamos o protocolo VioGén por un posible caso de violencia machista, pero aínda estamos investigando as causas da morte e a relación da vítima e o detido», anticipaban desde a Policía Nacional.
O presunto autor do crime, español de orixe peruana, foi detido no mesmo domicilio no que estaba a vítima, Maritza, un primeiro piso deste barrio popular da Coruña. A medida que avanzaba a mañá, a hipótese do homicidio vinculado á violencia machista foise confirmando. Segundo a Delegación do Goberno, a muller, peruana, figuraba no programa VioGén, o sistema de protección integral das vítimas de violencia de xénero e constaba unha denuncia contra o presunto agresor, pero non interposta por ela, senón presentada de oficio.
Conmoción nun barrio obreiro
O detido ten 61 anos e a vítima tiña 49. Polo momento, non se pode confirmar que fosen actualmente parella. «Cremos que vivían xuntos. Chegaron fai como un ano e vivían no primeiro de alugueiro», precisan uns veciños do edificio.
O inmoble no que residía a vítima é unha pequena construción de tres alturas máis un baixo pertencente a membros dunha mesma familia. «O piso no que vivía ela é dun irmán noso que o herdou e alúgao. Non coñeciamos moito aos seus inquilinos, máis aló de saudalos», remarcaba unha das propietarias.
Co susto aínda no corpo, outra das residentes, unha muller duns 80 anos que vive xusto amais do piso no que sucedeu todo, contaba como coñecera este suceso. «Non escoitei nada na planta de abaixo, espertoume a policía, estou aínda moi, moi nerviosa», respondía desde a fiestra. Outra familiar, que vive no relanzo do piso onde se produciron os feitos, narrou o mesmo. Tamén a espertaron os axentes.
Segundo indicou a subdelagada do Goberno foi o suposto asasino quen avisou á súa exparella de que agredira á vítima cun cunha arma branca, segundo transcendeu, un coitelo co provocoulle os feridas mortais. Esta persoa alertou ao 112 ás 06.59 horas do ocorrido, tras o que acudiron ao lugar Urxencias Sanitarias e a Policía Nacional. O persoal sanitario non puido facer nada pola vida da vítima e os axentes nacionais detiveron de inmediato o home. O cadáver da muller foi retirado para a autopsia mentres axentes da Policía Nacional recolleron probas. Ao mediodía remataron coa inspección ocular e precintaron o piso.
Fóra, na rúa, os veciños deste barrio acudían a contagotas para comprobar se a vítima era coñecida, conmocionados por un suceso deste tipo na súa veciñanza.
Concentración en María Pita
«Todo o meu apoio e agarimo para a familia da vítima. O machismo mata. Erradicalo é unha responsabilidade colectiva», indicou a alcaldesa da Coruña, Inés Rey, a través dunha publicación na rede social X. Un primeiro pronunciamiento ao que seguiu outro comunicado da rexedora: «Quero expresar a miña profunda dor por este asasinato machista ocorrido na Coruña. O machismo é unha lacra que temos que erradicar entre todos os demócratas, porque unha sociedade non pode avanzar se non se fundamenta na igualdade. Comportamentos como este non deberían ter cabida na nosa sociedade. Quero trasladar á súa familia o meu pésame, e convocar á cidadanía este luns pola tarde, ás 20.00 horas, na praza de María Pita, a unha concentración en repulsa por este terrible suceso», anuncia a política do PSOE.
Ademais da rexedora coruñesa, o PP da Coruña tamén expresou o seu rexeitamento ao crime a través das súas redes sociais. «A nosa firme condena e o noso total rexeitamento ante o presunto asasinato por violencia machista ocorrido esta madrugada na nosa cidade e todo o apoio á familia da vítima», publicaron na súa conta de X.
Máis aló desta concentración, antes, á unha da tarde, na praza de Pablo Iglesias haberá outra seguida dun minuto de silencio. Está convocada pola Plataforma de Igualdade e contra a Violencia de Xénero do Castrillón-Urbanización Soto Picus «como repulsa ó asesinato machista que sucedeu está madrugada na nosa cidade».
Dende aqui queremos facer chegar ou noso máis sentido pésame á familia dá vítima e manifestar a nosa firme condena contra a violencia machista.
A Delegación do Goberno contra a Violencia de Xénero informou, a través da rede social X, que solicita datos «por presunta violencia de xénero dunha muller na provincia da Coruña», en referencia a este caso. De confirmarse que é un crime de violencia machista, sería o primeiro no que vai do 2025 na Coruña. Na serie histórica, sería o crime 1.308 desde o 2003, e o 14 deste ano, ademais do 74 en Galicia, o segundo deste 2025. Na provincia da Coruña, sería o primeiro do ano en curso e o 26 na serie histórica, pendente do ditame da Delegación do Goberno contra a Violencia de Xénero.
As vítimas da violencia machista e a súa contorna poden pedir axuda en distintos recursos activos todos os días da semana e as 24 horas do día: o teléfono 016, o correo electrónico 016-online@igualdad.gob.es e a canle do WhatsApp no número 600 000 016
Nunha situación de emerxencia pódese chamar ao 112 ou aos teléfonos de emerxencias da Policía Nacional (091) e da Garda Civil (062) e, se non é posible facer esa chamada, en caso de perigo existe tamén a opción de activar a aplicación ALERTCOPS, que envía un sinal de alerta á Policía con xeolocalización.