O exregidor de Fisterra, José Manuel Traba, agora a cargo de Obras e Urbanismo

O goberno local de Fisterra xa está conformado. Os nomeamentos dos novos cargos, por decreto do alcalde Luis Insua, do PP, xa apareceron publicados no Boletín Oficial dá Provincia. E, como se aventuraba, o edil Francisco Martínez Traba, que concorreu na lista de Alternativa e deu o seu apoio á moción de censura, queda fóra do executivo.

Como tenentes de alcalde, de primeira queda Susana Rodríguez Nemiña, e o exregidor José Manuel Traba Fernández, como segundo. Ambos forman tamén parte da Xunta de Goberno Local, xunto ao alcalde. 

En canto a cargos concretos, José Manuel Traba Fernández foi designado como concelleiro delegado de Urbanismo e Obras; Susana Rodríguez Nemiña, a cargo de Cultura, Patrimonio, Novas Tecnoloxías, Educación, Igualdade e Muller. Jenifer Suárez Silva encargarase de Medio Rural, Medio Ambiente, Pesca e Marisqueo, Maiores e Mocidade. E Manuel Canoas Trillo, Mobilidade, Seguridade Viaria, Policía Local, Servizos Sociais, Deporte e Sanidade.

O edil Martínez Traba, na súa conta de Faceebok, diríxese á alcaldesa a propósito de als declaracións que onte deu nunha entrevista en Radio Voz, e fala sobre a súa ruptura co goberno do PP: «Os concelleiros do PP de Fisterra decidiron romper co acordo de goberno asinado con este concelleiro porque ou ben non queren ou non lle deixan (eu creo que ambas) levar a cabo o acordado e asinado no acordo programático. Señora Áurea Domínguez Sisto, verdade que sabe por onde van os tiros? Seguro que os motivos polos cales o PP rompeu o acordo sonlle bastante recoñecibles, xa que son os mesmos polos que vostede me botou do goberno. Señora Domínguez Sisto, para presentar a moción de censura contra vostede e o seu goberno, este concelleiro esixiu asinar un acordo onde, entre outras cousas moi necesarias para o municipio de Fisterra e os seus veciños, había que legalizar e regularizar o Servizo Municipal de Urbanismo e todos os contratos de servizos e subministracións, os cales vostede, do mesmo xeito que o resto de concelleiros e grupos políticos, sabe perfectamente que se atopan todos en situación irregular e ilegal».

Xunta e PP atribúense o mérito do futuro centro de saúde de Fisterra 

Fóra do ámbito da política local, a actualidade en Fisterra pasa por dúas cuestións. A primeira, o compromiso da segunda Casa do Maior, en Vilar. A segundo, que a Xunta anunciou onte no Parlamento autonómico que impulsará «as xestións necesarias» para a construción de novo centro de saúde, «no momento que desde o Concello se poña a disposición os terreos necesarios», como apuntou Encarna Amigo, portavoz de Sanidade do PP, quen engadiu: «Confiamos que o novo alcalde [Luis Insua] teña unha actitude máis conciliadora que o anterior goberno» e asegurou que «sen parcela, non hai centro de saúde posible». O futuro recinto triplicará en superficie e terá cinco consultas, unha de pediatría e unha sala de xuntas e para o persoal.

O deputado do BNG pola Costa da Morte, Óscar Insua, sinalou que a súa formación logrou «desbloquear» un proxecto, cuxa reivindicación veciñal «leva máis de vinte anos de retraso e promesas incumpridas», e que onte logrou saír adiante «por unanimidade». Lembrou cando no 2011 o PP prometeu un centro de saúde por 1,5 millóns e que estaría listo aquel mesmo ano: «Todo foi propaganda, pura e dura. Ese convenio nin se publicou nin se materializou».

---

---

---