Entidades sociais ocuparán ata o 5 de xaneiro os postos efémeros habilitados na praza de abastos
08 dic 2025 . Actualizado á 16:28 h.Os postos efémeros habilitados no Mercado Municipal de Cee tras a última reforma xa teñen aos seus primeiros ocupantes. Trátase de varias entidades sociais, que desde este martes e ata o próximo 5 de xaneiro estarán a vender alí os seus produtos e material promocional nun mercadillo solidario de Nadal promovido polo Concello. Estarán de luns a venres, de 10.00 a 13.30 horas (excepto festivos, que o recinto estará pechado).
Os postos, que se poden atopar entrando pola porta central da Avenida Lino Rodríguez Madero, distribúense do seguinte modo: na primeira caseta estará Aspadex, de luns a venres; na segundo, Cáritas recollerá alimentos os luns, mércores e xoves, mentres que Apem fará uso do espazo os martes e venres, e na terceira estará Paseniño os luns, mércores e venres, e a xunta local da AECC, os martes e os xoves.