Abren o restaurante e as vilas do complexo máis luxoso do litoral de Carballo
CARBALLO MUNICIPIO
Os bungalós e o «glamping» de Espazo Nature estrearanse en maio
15 mares 2024 . Actualizado ás 05:00 h.Na zona dos Peados, en Cambre, parroquia de Lema (Carballo), a moi poucos metros da liña divisoria con Razo , xa funciona a área de aloxamento e restauración máis luxosa de todo o litoral carballés, e tamén doutros moitos litorais. Trátase de Espazo Nature, que inclúe unha oferta moi ampla de servizos, ata agora inédita na zona, que aposta pola natureza e o luxo.
Desde esta semana (desde onte) funcionan xa o restaurante e as vilas. O restaurante, denominado Espazo x Tamboril, está especializado sobre todo en arroces, pero ofrece unha carta moi ampla. É tamén cafetería, que abre ás nove da mañá e pecha ás once da noite. Xa se pode acudir e reservar. Onte, familia promotora e empregados celebraron unha especie de inauguración e de posta en marcha dun proxecto que levaba xestándose desde fai case seis anos, e que amplía de xeito notable a oferta de calidade de toda a fachada marítima do municipio de Carballo, especialmente ligada a Razo, que experimentou un notable salto nos últimos tempos, e ademais de xeito non invasivo coa contorna. Neste caso, ademais, súmanse unhas espectaculares vistas, con toda a praia de Razo e de Baldaio aos pés.
Tamén están abertas desde onte as cinco vilas. As máis granes están pensadas para seis persoas, e está prevista a construción de piscinas con frontal de vidro para aproveitar esas vistas ao océano. Teñen cen metros cadrados repartidos en dous dormitorios e outros dous baños, ademais de cociña e sala de estar. Cada unha, nun recinto privado de 250 metros cadrados con mobiliario exterior. As pequenas teñen un cuarto, e hai unha adaptada para persoas coa mobilidade limitada. Cada construción posúe unha superficie de 70 metros cadrados sobre unha parcela particular duns 200. Estes edificios hanse realizado en madeira reciclada.
Quedan para o mes de maio, posiblemente a finais, para aproveitar xa o clima case estival, a apertura das cabanas ou bungalós, ademais das tendas de glamping . Os bungalós terán capacidade para dúas persoas nuns 22 metros cadrados cun dormitorio, cuarto de baño completo e cociña básica, ademais dunha parcela privada duns 40 metros, e tamén zona de terraza. E esas novas tendas con deseño especial están preparadas para tres adultos e familias con dous nenos pequenos, cuns 35 metros, cuarto de baño e cociña, terraza e mobiliario exterior.
E, finalmente, se reservas unha zona para caravanas e autocaravanas. Non excesivamente grande, pero cos servizos básicos. En todos estes ambientes teñen un peso específico o luxo e o contacto coa natureza, tamén o chamado turismo verde (están certificados como tales), o uso de enerxías limpas e ata a protección da biodiversidade na que se asintan estas estruturas.