Dous feridos moi graves nun accidente con catro vehículos implicados na autoestrada AG-55

Dúas persoas resultaron feridas, en principio de prognóstico moi grave, como consecuencia dun accidente de tráfico ocorrido este martes na autoestrada AG-55. A alerta activouse pouco despois do mediodía á altura do punto quilométrico 20,100, en Paiosaco (dirección Carballo).

As primeiras hipóteses a pé de estrada apuntan a catro vehículos implicados: tres coches e unha furgoneta, nun tramo duns 150 metros. O primeiro contratempo produciuse entre unha furgoneta e un vehículo marca Audi. Todo parece indicar que o condutor dun terceiro turismo freou coa intención de auxiliar aos ocupantes dos outros dous vehículos sinistrados cando resultou embestido por un cuarto coche.

Ata o lugar do sinistro acudiron axentes do destacamento e do Subsector de Tráfico da Garda Civil da Coruña, varias ambulancias medicalizadas e persoal de mantemento da autoestrada. O carril dereito, sentido Carballo, quedou cortado ao tráfico entre o punto 20,100 e 20,300 á espera de que os feridos, dúas persoas, fosen evacuados ao centro hospitalario de referencia e os vehículos, retirados da vía.

---

---

---