Media ducia de localidades ofrecen celebracións este sábado 1, Día de Todos os Santos
01 nov 2025 . Actualizado a las 05:00 h.Dende Carballo ata Fisterra houbo onte múltiples celebracións do Samaín, nuns casos máis lúdicas e noutros con maior reflexión sobre o que este tempo significa no patrimonio identitario galego. Hoxe bota a andar novembro, día 1, Día de Todos os Santos, e continúan esas citas, alén doutras máis relixiosas, como a multitudinaria misa que se agarda ás 17.00 horas no cemiterio de Carballo. No tocante ás propostas de Samaín:
A Laracha • Túnel do terror na praza Les Sables d’Olonne. Dúas sesións, unha infantil, para menores de 8 anos (17.00 horas) e outra terrorífica, para maiores desa idade (18.30). Entre as cinco e as oito, ademais, obradoiro de manualidades. Sen inscrición.
Corme • Da man da asociación de veciños Eduardo Pondal, inchables e merenda no polideportivo, a partir das 17.00. Pola súa banda, Insua de Viastela programou para as 23.00 horas unha visita ao cemiterio, con saída da Fonte do Campo. Nenos e nenas poden levar a súa propia cabaza.
Fornelos (Baio) • Organizado pola asociación A Fonte de Fornelos, ás 18.00 no local social, taller infantil de doces. Convidan a ir disfrazados. Logo, ás 21.00, celebración do magosto a base de churrasco, castañas, karaoke e festa. É preciso terse inscrito xa.
Laxe • Entre as 18.00 e as 22.00 horas, organizado pola área municipal de Comercio, Hostalaría, Turismo e Cultura, túnel do terror no polideportivo. Tamén vestiario de medo, manualidades con cabazas, música terrorífica, meiga do medo e mesas sensoriais adaptadas para nenos e nenas con diversidade funcional.
Con todo, non haberá que agardar ata a tarde para irse internando no ambiente de Samaín. Será posible porque na libraría Risón laxense teñen programada para as 12.00 horas unha sesión de contacontos. Non será a única cita do día neste establecemento, comprometido coa dinamización cultural dende o rural. Así, tamén para este 1 de novembro propón (19.00 horas) unha conferencia a cargo de Xisco Reina: Mis demonios y yo. Como recoñecelos, como aceptalos e como integralos na propia vida.
A Ponte do Porto (Camariñas) • Promove a comisión de festas da Ponte do Porto, coa colaboración do Concello de Camariñas, unha noite de Halloween con concurso de disfraces, baile, música e máis. Tamén premios! Discoteca CDC e DJ Yago Rivas porán a animación. No pavillón.
Tella (Ponteceso) • Promove a asociación cultural e deportiva Campo dos Seixos unha festa de Samaín que botará a andar con bailes e xogos para os máis pequenos (16.30). Ás 19.00 chegará Charly Braun cun espectáculo de maxia e todo iso redondearase con sorteos, rosca, chocolate e petiscos variados.
Vimianzo recibe á Orquestra de Cámara Galega
Hoxe • Fóra do Samaín, tamén hai hoxe na Costa da Morte interesantes paradas, como o concerto da Orquestra de Cámara Galega no auditorio da Casa da Cultura de Vimianzo: 20.30 horas, 5 euros. Soarán composicións de Handel, Alessandro Marcello, Edvard Grieg ou Rogelio Groba, pai e fillo, segundo avanzaba o director en La Voz. Oportunidade única na Costa da Morte.
Cee • Comezan na Casa da Cultura as 24.ª Xornadas Micolóxicas Costa da Morte, con Pan de Raposo. Saída ao monte con Julio Cabero (10.30) e os seus cans Rany e Kayra, con moito que ensinar na procura de cogomelos. Ás 18.00 ofrecerá el mesmo unha charla: Trufa negra y hongos hipogeos.
Corcubión • Ás 20.00 horas, na Casa da Cultura, comedia ácida e feminista con Camtheam: Veredicto. Humor, reflexión e forza neste Circuíto Galego de Teatro Amador.
Zas • De 19.00 a 22.00, nova sesión de baile para maiores no centro sociocultural, hoxe amenizada polo Trío Digital.