Son «Gracias por su visita», de Uxía Algarra, e «Alicia wants to», de Estrella Tomé
31 oct 2025 . Actualizado a las 05:00 h.A novena edición do certame de microescenas Metro Cadrado do Festival Internacional Outono de Teatro de Carballo (FIOT) xa ten gañadores. Déronse a coñecer este xoves logo de finalizar o reconto das votacións do público. As pezas máis valoradas, recibindo 150 euros en ambos casos, resultaron ser Gracias por su visita, de Uxía Algarra, premio ao mellor espectáculo; e Alicia wants to, de Estrella Tomé (Bengala Teatro), premio á mellor interpretación. Froito do acordo do festival carballés con Culturgal, as dúas obras serán convidadas a participar no Culturgal este novembro.
Na novena edición de Metro Cadrado foron un total de 347 espectadores, 222 votantes e unha nota media dos espectáculos de 4,21 sobre 5, subindo a 4,39 no caso das interpretacións. Diversidade, calidade, diferentes linguaxes e visibilización do emerxente: foron boa parte das claves sinaladas dende organización sobre o que ofreceu este programa nesta ocasión.