O enfrontamento será o domingo, en Estaleiro (15.45 horas)
24 oct 2025 . Actualizado á 05:00 h.O Bergantiños de Simón Lamas non puido ter mellor arranque de liga. Tras sete xornadas en Segunda Federación (grupo 1), marcha cuarto, empatado a puntos co terceiro e o quinto: Ximnástica Segoviana e Real Ávila. Ten 14, un menos que o segundo, o Real Oviedo B, e cinco menos que o Fabril. En postos de promoción de ascenso, o Salamanca, o Mariño de Luanco e o Numancia perségueno moi de preto con 13, 12 e 11 puntos.
Este domingo visitará o Raio Cantabria, filial do Racing de Santander. O enfrontamento será nOs Campos de Sport dEl Astillero ás 15.45 horas. O partido poderase seguir vía Youtube a través da canle dos santanderinos.
O rival só gañou o primeiro encontro da competición contra o Mariño de Luanco (1-0). Perdeu na casa contra o Fabril por 2-3 e na súa visita ao Numancia (2-1). Salvo no duelo no seu feudo contra o Burgos B, no que non houbo goles, sempre marcou, pero sen pasar do empate: 2-2 no estadio do Langreo e 1-1 contra a VDE Ourense nEl Astillero e no campo do Atlético Atorga, a pasada fin de semana. O dianteiro Sergi Baldrich é o seu máximo goleador con 3 tantos.
Pola súa banda, os vermellos pásalles xusto o contrario. Só perderon o segundo choque de liga, empataron noutras dúas ocasións e suman catro vitorias. O centrocampista Marc Marrocos, con 6 dianas, está a unha do pichichi deportivista Bil Nsongo.
Os cántabros encaixaron 9 tantos por 8 anotados, en tanto que os carballeses enviaron á rede 13 por 8 recibidos.
Os que exercerán de locais están a un punto do play-out de descenso. É unha partido clave, pois, para os intereses de cada conxunto.