Berdillo, Muxía ou Baio acolleron esta fin de semana destacados actos culturais
12 may 2025 . Actualizado á 05:00 h.Querían un día para a historia e tivérono, por máis que houbese que cambiar O Moucho ou o Xardín das Cereixas polo local social. Poñerse a cuberto polo tempo non restou ápice de emoción nin cariño na Ruada das Cereixas coa que as asociacións cultural e xuvenil Arume de Berdillo renderon homenaxe o sábado a todas as tocadoras desta parroquia carballesa. As que foron, históricas, e as aínda son, como Pepa e Ermitas, que compartiron unha tarde enteira de actuacións con nenos, mozos e xa adultos: once grupos e máis de 110 persoas polo escenario. Tempos de antes e de agora, posibles estes porque houbo quen cantou, gardou e legou. Día de memoria e esplendor.
En Muxía, a señora Pilara, a medio camiño entre os 90 e os 100 anos, díxolle á súa neta, Carme Toba, que ela quería ir «a esa foliada». E foron. A foliada non era outra que a mesa De Eva Castiñeira ás Vellas de Mens, presentación dos libros Cantareiras, de Xosé Manuel e Icía Varela, e As Vellas de Mens, de José Manuel Fernández, muxián de corazón. Ocorreu todo no Salón do Voluntariado, iniciativa de Muxía Cultural. Eva, de Agranzón, e as de Mens son homenaxeadas este ano, así que a proximidade tira dos afectos. Carme e Pilara, que lembrou episodios da vida da súa veciña Eva tales como a voda, foron informantes para a obra dos Varela, como tamén algúns dos presentes no público. Na mesa de relatores, Juan José Alvite, un dos fillos de Eva, e o muxián Manuel Vilar, exdirector do Museo do Pobo. Coas Abaladeiras chegou a parte musical, tres pezas da muxiá.
Hoxe, en torno ás Letras...
Avanzarán este lunes 12 de maio as Letras Galegas na Costa da Morte con María Faltri no centro cívico de Malpica (10.00 e 12.00), cos Ratos de Lonxedetodo en Baio (18.00, axencia de lectura) e a ciencia de Hípica Celta en Olveira, Dumbría (18.00, biblioteca).
Satisfacción en Baio, a pesar de ter de fronte ou tempo e incluso ou fútbol
Baio ten as Letras, o renovado Baio ten a Pelota, botou onte o peche na localidade. O tempo desapracible non axudou nin venres nin as horas centrais do sábado, mais a noite do segundo día foi outro cantar, cando menos nos bares adheridos á ruta de tapas, con grande actividade e incluso algunha contratación. Rebeca Facal, secretaria de BaiOn, entidade organizadora xunto con Concello de Zas, manifestaba onte unha satisfacción xeral, tamén por parte dos comercios. Cadrou que xogasen o Baio e o Barcelona, co que iso implica para as citas desas horas. Os cambios sempre levan un tempo, reflexiona o alcalde, Manuel Muíño, que tamén referencia a importancia do factor tempo. O ano pasado tiveron sol. Menciona ademais a satisfactoria asistencia a propostas como as presentacións de libros. Xusto cando se divulgaba IA para a sociedade chegou o Nobel Kip S. Thorne, da man de Jorge Mira. Toda unha feliz coincidencia.