O colexio de Caión, premiado tras fomentar na localidade a recollida de aceite usado

Ou colexio de Caión é un deses centros que se apuntan a todo o que axude na concienciación e divulgación do coidado medioambiental. Entre varias iniciativas, destaca tamén a súa aposta pola recollida de aceite vexetal usado a través do proxecto Bioescolas, que puxeron en marcha hai agora tres cursos coa empresa Arioil. Unha actividade que impulsaron dende a ANPA A Balea, da que é presidente Paco Rey, e pola que o centro xa foi premiado en dúas ocasións.

—Como comezou todo isto?

—Pois este é o terceiro curso que participamos. Contactaron con nós dende Arioil para este proxecto que podía reportar beneficios para as ANPA. Así, tódolos meses deixan un contedor pequeno e os nenos van recollendo o aceite que lle deixamos, tanto dende as familias como de moitos veciños da vila. Levamos estes dous últimos cursos conseguindo o primeiro premio anual, no que se observa a cantidade recollida e a proporción cos alumnos de cada centro. Son 500 euros que intentamos optimizar o máximo posible.

—O alumnado comprende así a importancia de reciclar?

—A maior parte si se dá conta da importancia que ten recoller o aceite usado. Os máis pequenos, ademais, van vendo o que van facendo os alumnos maiores e, sobre todo, séntense atraídos polas recompensas e por ver a foto doutras xeracións co diploma na entrada. A partir de aí, é máis doado explicar as vantaxes destas medidas.

—E os pais?

—Os pais notámolo. Aínda que nas zonas rurais xa dende pequenos temos o costume de intentar aproveitalo todo e non tirar por tirar. Pero son moitos os que se achegan a preguntar onde depositar o seu aceite usado. ou avoas que che comentan que foron gardando botellas. A sociedade, en xeral, está xa moito máis concienciada, pero isto axuda.

---

---

---