O Concello de Ribeira impulsa o centro de deportes náuticos para finalizar a súa estrutura este ano
RIBEIRA
A alcaldesa, María Sampedro, xunto á edila de Facenda e técnicas municipais reuníronse con responsables da adxudicataria da obra
21 oct 2025 . Actualizado á 14:51 h.O novo goberno de Ribeira, encabezado por María Sampedro, comezou a estudar o estado de execución no que se atopan diversas infraestruturas públicas que contan con investimento municipal. Trátase, din desde o executivo, dunha liña estratéxica de traballo. Entre as obras avaliadas figura o centro de deportes náuticos que se emprazará en Aguiño.
O Concello deu un impulso a esta intervención e sinala que a folla de ruta trazada fixa para final de ano a finalización da estrutura e para marzo do 2026 o total da obra.
En concreto, indicouse que a partir da próxima semana chegarán as estruturas prefabricadas de formigón para conformar o esqueleto da nave. O proxecto tivo que ser modificado por cuestións de terreo que afectaban á cimentación. Desta forma, prevese que en novembro poidan estar listas as paredes e, en decembro, a cuberta.
Tras completar esta fase exterior traballarase no interior. Representantes municipais, coa alcaldes á fronte e a edila de Facenda, Herminia Pouso, mantiveron un encontro na casa do concello con responsables da empresa adxudicataria da obra. Á reunión tamén acudiron técnicos municipais.
O equipamento
No que respecta ao equipamento, María Sampedro precisou que se contará coa colaboración do Club de Remo para asesorar no que respecta ao material deportivo necesario.
A construción consta de 1.156 metros cadrados que están distribuídos en dúas plantas. O importe da adxudicación do contrato é de 1,1 millóns.
Sobre o estado de diversas obras, María Sampedro denunciou «a situación de parálise na que estaban sumidos moitos proxectos vitais para a veciñanza».
En relación ao centro de deportes náuticos, a alcaldesa recalcou que «somos un municipio que mira ao mar, tamén no ámbito do deporte, e resulta necesario progresar na execución deste edificio».
O inmoble que se emprazará en Aguiño constará, ademais dun foso de adestramento e dun espazo para albergar o material, cun salón multiusos.
De igual xeito, disporá dunha cociña para os usuarios, dun despacho, ximnasio, recepción e oficina.