Yoli Paz, mil euros en compras con cargo á Asociación de Empresarios de Ribeira
RIBEIRA
A filla de José Paz Cadaval, que presidiu a entidade durante oito anos, lembrou que o seu pai puxo en marcha o centro comercial aberto Viamare
15 may 2025 . Actualizado á 19:21 h.A ruleta da fortuna quixo que fose a veciña de Ribeira Yoli Paz a afortunada cos mil euros en vales de compra sorteados pola asociación de empresarios con motivo do Día da Nai. Recibiu o premio na sede da patronal, a mesma que o seu pai, o empresario José Paz Cadaval, presidiu durante oito anos. Nun momento tan especial, Yoli Paz lembrou que foi o seu proxenitor, falecido en abril do 2023, quen puxo en marcha o centro comercial aberto Viamare que continúa en activo aglutinando un bo número de negocios.
Na súa breve intervención á hora de recoller o simbólico cheque, Yoli Paz agradeceu a iniciativa da patronal, á vez que destacou a implicación do pequeno comercio para facela posible. Así foi como Yoli fixo compras por valor de mil euros con cargo á asociación de empresarios de Ribeira.
Tiña decidido o itinerario, comezando por Marfil, a tenda cuxo billete de compra resultou ser o agraciado. Alí atendeuna a dona, Lidia Rivas. Acompañando a Yoli Paz estaba a súa parella, Alberto Fernández, e o presidente dos empresarios, Francisco Martínez.
Un pouco para todos
A afortunada subliñou que ía gastar o diñeiro do premio nas tendas nas que compra habitualmente, pero non todo ía ser para ela. Tanto a súa parella, como os seus fillos e a súa nai ían ser destinatarios dalgún obsequio inesperado.
Á entrega do cheque asistiu tamén o tenente de alcalde Vicente Mariño, quen comprometeu o apoio do Concello ao comercio local. O presidente da patronal asegurou que seguirán facendo campañas. Outros agraciados que recolleron os seus premios foron Merche Fungueiriño, unha cea para dúas no Sisal, e Antonio Sampedro, que recibiu un vale de 50 euros para gastar no Gadis.