Villaverde rexeitou en Porto do Son o veto ao palangre demersal
06 nov 2025 . Actualizado á 18:53 h.A conselleira do Mar, Marta Villaverde; a número dous do PP galego, Paula Prado; o eurodeputado Francisco Millán Mon; e o alcalde Luis Oujo reuníronse a tarde deste xoves en Porto do Son con representantes da pesca galega para escoitar as súas demandas.
A conselleira manifestou o seu apoio ao sector ante os desafíos que se lle presentan, como por exemplo o novo marco financeiro plurianual, que dilúe o Fempa (Fondo Europeo Marítimo, de Pesca e de Acuicultura) nun gran fondo xunto co agrícola, recortando as achegas ao sector pesqueiro nun 67%, cifrou Millán Mon.
Villaverde tamén se referiu ao proceso de revisión da política pesqueira común e á inminente negociación dos TAC e das cotas para o 2026. A titular autonómica confirmou que Galicia participou no recurso de casación presentado polo Estado ante a xustiza europea contra a sentenza que avalou o veto da Comisión ao palangre demersal en 87 zonas do Atlántico nororiental. Esta medida, lembrou, afecta ao 25% da flota galega, e desde a súa posta en marcha xa xerou un impacto económico de 216 millóns de euros.
Presión en Europa
O eurodeputado popular, pola súa banda, incidiu neste sentido, destacando a «presión» do seu grupo para excluír o palangre de fondo da prohibición desas 87 áreas.
Millán Mon comprometeuse a «continuar levando a Bruxelas» as «preocupacións e prioridades» do sector pesqueiro galego.
Pola súa banda, a secretaria xeral do PPdeG, Paula Prado, erixiu á súa formación como «o partido da pesca, xa o din as nosas siglas», xa que «sempre estivo e estará a favor da xente do mar».
O rexedor Luis Oujo eloxiou o traballo dos profesionais do ámbito da pesca en Porto do Son por «facer posible que a nosa costa e o noso mar sigan sendo un motor económico e social para o noso municipio».