O coliseo Noela recibiu a primeira choiva de estrelas cinematográficas, ás que se sumou o xogador Mario Soriano
13 nov 2025 . Actualizado á 13:47 h.Non quixo avanzar moitos detalles a organización da Mostra de Curtas de Noia sobre a gala inaugural, buscando sorprender ao público e conseguiuno con fartura. A cerimonia, dirixida polo actor Federico Pérez, que contou sobre as táboas coa axuda de Tito Rober e a raíña drag Vaina, fixo unha emotiva viaxe polo cuarto de século de historia do festival, lembrando a boa parte das figuras do audiovisual que pisaron nalgún momento a alfombra vermella.
Carmen Méndez, Ledicia Sola, Marta Doviro, Juan Galiñanes, Raquel Menor, Antonio Mourelos, David Amor, María Marnez... Foron moitos os actores que pasaron polo escenario do Noela para compartir recordos e anécdotas. O talento local tamén estivo representado a través de figuras como a veterana Rosita Paz, homenaxeada o ano pasado; Julio Mayo, integrante de Monoulious DOP; e os actores Javier Rodríguez e Jorge Gallardo.
En máis dunha ocasión lanzáronse agradecementos cara aos veciños e o tecido asociativo local polo seu apoio ao festival, con mención especial para o Liceo de Noia, unha institución cultural clave na localidade. O seu presidente, Óscar Prego, lembrou cando, o ano da pandemia, a sociedade brindou a súa sede para garantir a celebración do certame dentro das restricións sanitarias.
Narices vermellos por Brandariz
Un dos momentos máis emotivos chegou cando os presentadores, xunto con David Amor, luciron narices vermellos en memoria de Pedro Brandariz, falecido no 2022, un xesto que espertou un sonoro aplauso do respectable. Tamén sorprendeu, e moito, a presenza na gala do xogador do Deportivo da Coruña Mario Soriano.
Houbo espazo tamén na gala inaugural da Mostra de Curtas de Noia para as intervencións de carácter institucional. A concelleira de Cultura, Chelo Martínez, destacou a capacidade do cine para facer reflexionar e soñar, reivindicándoo como ferramenta de identidade, pero tamén como memoria colectiva e como un dereito.
O alcalde, Francisco Caamaño, que subiu ás táboas na recta final da cerimonia, referiuse á relevancia que o festival acadou a nivel non só galego, senón nacional e internacional, agradecendo o apoio que sempre lle prestaron os veciños. O rexedor estivo acompañado na súa intervención pola deputada de Igualdade, Lingua e Dereitos Civís, Soledad Agra, que felicitou á organización da mostra pola súa longa traxectoria: «26 anos sementando cultura no audiovisual galego».
Antes de dar por finalizada a gala, Federico Pérez fixo fincapé no talento galego e no espírito comunitario «que fan dá Mostra de Curtas un evento único». Foi a artista Vania a que puxo o broche de ouro. Interpretou a canción Nin ti nin ninguén e conseguiu levantar ao público que abarrotaba as butacas do coliseo Noela.