O conxunto de Alberto Mariano xogará esta segunda xornada en sábado buscando o seu primeiro triunfo
12 sep 2025 . Actualizado á 19:10 h.O Noia xogará este sábado, ás 18.00 horas, nun campo sempre complicado, o dun Alondras que, considera o técnico dos noieses, Alberto Mariano, é claro favorito a pelexar polos postos de fase de ascenso. «Reforzouse ben. Ten moito talento arriba, pivotes moi fortes e moitísimos recursos. É un dos cocos e demostrouno o outro día facendo un gran partido e conseguindo a vitoria en Vilalba», comenta o adestrador.
Explica Alberto Mariano que teñen que «intentar non conceder en defensa e non cometer os dous ou tres erros de vulto que facemos por partido. Sen balón, o Alondras sofre máis e creo que as condicións do seu campo non benefician ao seu estilo futbolístico, pero bo, estarán acostumados». Ademais, os noieses teñen que mellorar no apartado ofensivo e «estar máis acertados que a fin de semana pasada contra o Lugo B».
Sabor amargo
Porque o duelo que serviu para inaugurar a competición deixou un sabor máis que amargo: «Pasamos un mal momento ao final da primeira parte, pero a segundo foi nosa e tivemos ocasións claras para facer outro tanto que asegurase o triunfo e no seu gol cometemos moitos erros».
É consciente o técnico de que o Noia aínda é un «equipo moi mozo e en construción, estamos en proceso de formación e se ten que pasar algo así, mellor que sexa xa na primeira xornada. Perdemos dous puntos que para nós supoñen un 5% da salvación, que estimamos que estará en 40 puntos. Xa gañarán noutros partidos. Non estamos contentos con ese empate, pero sumar sempre é unha bo sinal».