A ABE pecha a súa campaña dixital cun alcance nos seus vídeos de máis de 1,6 millóns de impresións
BARBANZA
contou coa participación de 112 empresas e a creación de máis de 50 vídeos personalizados
04 dic 2025 . Actualizado á 19:10 h.A Asociación Boirense de Empresas (ABE) pechou a maior campaña de promoción dixital realizada en Boiro, unha iniciativa inédita na comarca que acadou 1,62 millóns de impresións en Facebook e Instagram. A acción, desenvolvida entre marzo e outubro, contou coa participación de 112 empresas e a creación de máis de 50 vídeos personalizados.
Os reels foron o principal motor de alcance: Facebook rexistrou 606.000 impresións, mentres que Instagram superou o millón de visualizacións, con varios vídeos pasando as 20.000 reproducións.
A campaña impulsou o crecemento das redes da ABE, que suman xa máis de 6.280 seguidores, cun aumento notable da comunidade local. Este reforzo permitirá que futuras accións da asociación teñan un impacto aínda maior.
Un fito
O proxecto foi producido pola cooperativa Kracia, e a ABE destaca que a iniciativa supuxo un fito tanto pola magnitude do traballo como polos resultados. A entidade prevé seguir apostando por campañas innovadoras que fortalezan o comercio e o tecido empresarial do municipio.