O circuíto 4 carreiras, 1 meta de Barbanza Arousa regresa para promocionar o deporte e o turismo
BARBANZA
A Pobra acollerá a primeira cita o domingo 31 de agosto e seguiranlle Ribeira, Rianxo e Boiro
21 ago 2025 . Actualizado á 17:39 h.Os centros históricos, espazos naturais e elementos patrimoniais dos municipios que integran a Mancomunidade Barbanza Arousa serán os escenarios dunha nova edición do circuíto 4 carreiras, 1 meta, que impulsa a entidade e que se desenvolverá entre os meses de agosto e decembro. Esta iniciativa busca tanto promocionar a práctica do deporte ao aire libre como promover os atractivos turísticos da Pobra, Boiro, Rianxo e Ribeira.
«Desde a mancomunidade animamos a toda a cidadanía a formar parte desta proposta que é moito más que unha carreira. É unha oportunidade para compartir, gozar en familia, con categorías para todas as idades, e para descubrir o patrimonio dun lugar que paga a pena visita», sinalou na presentación da actividade o presidente de Barbanza Arousa e alcalde de Rianxo, Julián Bustelo, que estivo acompañado polo seu homólogo na Pobra, José Carlos Vidal, e os edís de Deportes de Boiro e Ribeira, Marcos Fajardo e Xabier Vidal, así como de persoal técnico deportivo dos concellos implicados na proposta.
A primeira parada deste circuíto será A Pobra xa o 31 de agosto. Continuará en Ribeira, o 27 de setembro; proseguirá en Rianxo, o 1 de novembro, e concluirá en Boiro, o 7 de decembro. A participación está aberta a todo tipo de corredores, tanto afeccionados como federados, independentemente da súa procedencia.
De feito, apunta a mancomunidade, «esta proposta deportiva segue medrando ano tras ano, o que favorece que cada vez máis visitantes, tanto de Galicia como doutras comunidades autónomas, se acheguen ao territorio».
Escapadas curtas
Un dos obxectivos deste circuíto é «atraer ese turismo de proximidade que busca escapadas curtas ao longo do ano para gozar da gastronomía local, das rutas de sendeirismo, da paisaxe, dos miradoiros, museos e do patrimonio histórico». Por iso, ademais de premios económicos entregaranse experiencias turísticas na comarca.
O inscrición no circuíto pódese realizar a través da páxina web emesports.es. A data límites para inscribirse ás catro carreiras que o compoñen é o 28 de agosto.