Arousa volve ser un dos motores do descenso mensual do paro en Galicia, cun cento de desempregados menos

O colectivo de parados rexistrados nas oficinas públicas de emprego dos once concellos da banda sur da ría de Arousa reduciuse en marzo en 101 persoas, para situarse nas 4.643. O novo dato supón un descenso do 2,13 por cento respecto ao do peche de febreiro. Un comportamento que situou a comarca á vangarda da redución do número de traballadores na procura dun contrato en Galicia por segundo mes consecutivo. En febreiro, cunha redución de 52 parados, só por detrás de Vigo e o seu hinterland, con 132. En marzo, como cuarta zona da comunidade en termos absolutos, logo da da Coruña, con 345 demandantes de emprego menos, da de Vigo, con 266, e da de Santiago, con 174. 

Os bos datos arousáns superan a media da diminución mensual do paro rexistrado en Galicia, dun 1,51 por cento (-1.822 persoas), e cuadriplican a da caída experimentada no conxunto de España, do 0,5 por cento (-13.311).

O comportamento positivo estendeuse por oito dos once municipios do sur da ría. Con Vilagarcía de Arousa liderando a tendencia en termos absolutos con 45 parados menos, pasando dos 2.219 ao peche de febreiro aos 2.174 do remate de marzo. Claro que, porcentualmente, o concello con mellores rexistros no último balance foi o de Meis, con 22 menos, dos 176 aos 154, isto é, unha caída do 12,5 por cento. Ribadumia, pola súa banda, mellorou as súas cifras en 15 desempregados, dos 171 aos 156, nunha baixada do 8,8 por cento. Tamén reduciron parados Cambados, 7 (de 574 a 567), Vilanova de Arousa, 6 (de 483 a 477), Pontecesures, 5 (de 129 a 124), Valga, 4 (de 214 a 210) e Meaño, 1 (de 141 a 140. Catoira repetiu cifra, 135, e só A Illa de Arousa, con 3 parados máis (de 138 a 141) e O Grove, cun (de 364 a 365), presentaron números vermellos.

Por sectores, o servizos experimentou a maior caída en marzo en cifras absolutas, de 62 persoas en busca de emprego, desde as 3.319 de febreiro ás 3.257 ao final do mes seguinte, un 1,9 % menos. Con todo, a construción foi o sector que mellor se comportou en termos relativos, cunha baixada do 5,4 por cento, dos 312 aos 295 parados. Unha porcentaxe lixeiramente superior á computada na industria, con 27 profesionais menos nas listas das oficinas públicas de colocación, caendo dos 560 aos 533, un -4,8 por cento.

A boa liña sinalada tivo as súas excepcións na agricultura e na pesca, cun parado máis, computando 207, e o colectivo de persoas sen un emprego anterior, que se elevou desde os 347 aos 351 demandantes dun contrato laboral.

En cuestión de sexos, a caída do paro na comarca resultou desta volta máis equilibrada ca en febreiro, cando 50 dos 52 parados menos foran homes. En marzo, os 101 profesionais que saíron das listaxes do paro rexistrado repartíronse entre 58 mulleres (agora un total de 2.647) e 43 varóns (seguen na procura dun emprego 2.097).

---

---

---