O auditorio de Vilagarcía acollerá o sábado un musical benéfico
04 oct 2023 . Actualizado á 05:00 h.Leva anos a asociación galega de linfedema, lipedema, insuficiencia venosa crónica e outras patoloxías vasculares periféricas intentando facerse un oco no sistema. Intentando sacar a cabeza para visibilizar unhas enfermidades que parecen raras, pero que son menos raras do que se pensa. Nesa pelexa está o colectivo que puxo en marcha Juan Manuel Lameiro hai practicamente vinte anos e para iso é fundamental ter un espazo, pero tamén os recursos suficientes para desenvolver un labor que cada día é máis importante porque os casos crecen, segundo explicou a traballadora social da asociación María Araújo.
Con ese dobre obxectivo, publicitario e económico, púxose en liza o musical que se poderá ver no auditorio este sábado. Nada menos que Mamma Mia!, coas cancións do mítico grupo ABBA e unha vintena de persoas sobre o escenario da man do colectivo Wakea, un proxecto colaborativo dirixido por Mabel Oroso que ten como obxectivo botar unha man a distintas asociacións da provincia de Pontevedra.
O musical celebrarase no auditorio de Vilagarcía desde as nove da noite. As entradas teñen un prezo de 10 euros e poderanse recoller no local de asociación, sito na avenida López Ballesteros, 13 (no edificio da estación de autobuses) en horario de 10.30 a 13.30 horas; chamando por teléfono ao 630 024 428, ou ben no despacho de billetes do propio auditorio en horario de 11.00 a 13.00 horas.
«Unha boa idea»
Á presentación do espectáculo acudiu a concelleira de Cultura de Vilagarcía, Sonia Outón, que se congratulou de que o auditorio volva acoller un acto solidario. «É deses musicais clásicos que ten moitos seguidores, e paréceme unha moi boa idea para recadar fondos, que irán integramente destinados á asociación», afirmou a edila