Salvamento rescata a unha muller en apertos sobre un kaiak preto da praia de Raeiros
O GROVE
A bañista afastárase demasiado da costa e era incapaz de regresar a terra polos seus propios medios
15 ago 2025 . Actualizado á 05:00 h.Salvamento Marítimo rescatou este mércores, a última hora da tarde, a unha muller a bordo dun kaiak nas inmediacións da praia de Raeiros, no Grove. Ao parecer, a usuaria da embarcación afastárase moito da costa e non era capaz de volver a terra polos seus propios medios, polo que tivo que pedir auxilio.
Tras recibir a chamada dunha persoa alertando da situación, desde o centro de salvamento de Fisterra mobilizouse a embarcación Hermes de Cruz Roja, con base en Ribeira, que localizou de inmediato o kaiak e puido remolcar á vítima ata o porto de San Vicente. Emerxencias O Grove recibiu tamén aviso do incidente e trasladou aos seus efectivos en lancha ata o lugar, nun punto afastado en dirección a Ons. Por fortuna, nese momento a embarcación de Cruz Roja xa chegara ata alí, e encargouse de levar á muller a Pedras Negras en perfecto estado.
Unha vez máis, a rápida mobilización dos servizos de emerxencia e salvamento fixo que non houbese que lamentar males maiores, xa que as correntes e os refachos de vento nestas zonas en ocasións xogan malas pasadas a quen sae a gozar dun intre de lecer e no mar, provocando estes contratempos, polo que se pide precaución á hora de realizar estas prácticas.