Faranse actividades coa veciñanza e nos colexios co fin de explicar como se recicla a materia orgánica e o funcionamento da planta de Baión
09 abr 2025 . Actualizado a las 15:21 h.Baixo o lema «O marrón, o contedor que devolve vida», Sogama inicia na comarca unha campaña informativa orientada a incrementar a achega de materia orgánica ao contedor marrón e favorecer así a elaboración de maiores cantidades de compost na planta de biorresiduos situada en Baión (Vilanova), un abono natural de alta calidade con posteriores aplicacións na agricultura e xardinería. «O maior uso deste recipiente non só contribuirá ao cumprimento dos obxectivos europeos en materia de residuos, senón que traerá consigo beneficios económicos para os concellos, xa que, mentres o canon de biorresiduos para este ano 2025 ascende a 51,4 euros/toneladas, o da bolsa negra sitúase en 83 euros/tonelada se os entes locais cumpren requisitos», segundo informa Sogama.
A empresa remitiu escritos aos concellos de Cambados, O Grove, Meis, Poio, Vilanova, Caldas e Sanxenxo para contar coa súa colaboración na organización de sesións formativas e talleres dirixidos á veciñanza. De forma paralela, está a levar a cabo xornadas presenciais nos centros educativos nos municipios, tendo concretado datas en colexios e institutos do Grove, Poio, Cambados e Vilanova.
Educadores especializados ao servizo da compañía son os encargados de explicar ao alumnado as razóns da incorporación do quinto contedor ás rúas, cal debe ser o uso do mesmo, que residuos deben e non deben ser depositados neste recipiente e como é a operativa de xestión dos mesmos desde que se recollen de forma diferenciada por parte dos servizos municipais ata que chegan á planta de compostaxe de Vilanova para ser procesados.
Así mesmo, están a entregarse folletos explicativos aos estudantes e docentes que asisten ás charlas a fin de que lles sirvan para reforzar coñecementos e os utilicen como manual de consulta nos fogares, contribuíndo con isto a mellorar a selección dos biorresiduos en orixe por parte das familias. Entre os recursos empregados, os monitores fan uso de presentacións, vídeos e xogos cos que aprenden como se deben tratar os residuos orgánicos dunha maneira ecolóxica.