As depuradoras de Cambados, Ribadumia e Meaño entran no plan autonómico de control de verteduras industriais
CAMBADOS
Augas de Galicia actualizará o censo de indutrias e fará inspeccións e auditorías
13 ene 2023 . Actualizado ás 20:22 h.Augas de Galicia actualizará o censo de industrias obrigadas a contar con autorización de vertedura nas redes públicas de saneamento e realizará inspeccións e toma de mostras nas mesmas. Ademais, prevé a asistencia aos concellos e a Augas de Galicia, tanto loxística como tecnicamente, na realización dos traballos de campo encamiñados á detección e seguimento dos vertidos industriais detectados e das medidas adoptadas polos titulares para a emenda do foco e o cumprimento do regulamento.
Neste paquete de medidas entran tres estacións depuradoras da comarca situadas en Cambados, Ribadumia e Meaño.
A consellería de Infraestruturas e Mobilidade licitou hoxe por 1.809.173 euros o servizo de apoio técnico para o control de verteduras de usuarios non domésticos aos sistemas de saneamento, así como para a realización de auditorías nas redes de saneamento e nas estacións depuradoras de augas residuais.
Entre os factores que se avaliarán inclúese a análise da entrada de volumes elevados de infiltración de augas brancas e augas pluviais nas instalacións; as entradas de auga de mar na rede de saneamento; os vertidos industriais que incumpren o requirido pola lexislación vixente ou outras situacións anómalas que condicionan os caudais e cargas recibidos nas plantas de tratamento de augas residuais, segundo informan desde o departamento autonómico.