Catorce rexistros e seis detidos nunha nova operación contra as redes do crime organizado na provincia de Pontevedra
AROUSA
Un dos arrestos do operativo, coordinado desde Cambados, produciuse en Francia
17 dic 2025 . Actualizado á 21:41 h.Vilanova volveu a espertarse este mércores cun sobresalto. Desde primeira hora, na Praza do Parque instaláronse tres furgóns da Policía Nacional, que blindaron a contorna do edificio en cuxo baixo ten a súa sede unha entidade bancaria. Varios axentes traballaron no interior do devandito inmoble, presumiblemente rexistrando algunha das vivendas do mesmo.
Non foi Vilanova a única localidade na que se produciron este tipo de imaxes: durante a mañá realizáronse rexistros en catorce puntos dos partidos xudiciais de Vilagarcía, Cambados, Redondela, Pontevedra e Cangas. Ademais, froito deste operativo foron detidas seis persoas, unha delas en Francia. Os cinco restantes pasarán o venres pola mañá ao dispor do Tribunal de Instancia de Cambados, en concreto da praza número tres. A causa está declarada secreta.