Así chega o conxunto vilagarcián ao duelo entre os dous mellores equipos do grupo galego da Terceira RFEF
25 nov 2025 . Actualizado á 05:00 h.A liga de Terceira RFEF se para esta semana pola participación da selección galega de fútbol afeccionado na primeira fase da nova edición da Copa das Rexións UEFA. A paréntese será a antesala ao, sobre o papel, mellor partido que nestes momentos poida ofrecer o Grupo 1 da última categoría do balompé español. O que enfrontará, o primeiro domingo de decembro desde as 18 horas no céspede do Estadio Verónica Boquete-San Lázaro, ao líder, o Compostela, co segundo clasificado, o Arousa.
O conxunto que dirixe Gonza chega nun momento óptimo a un duelo que podería resultar definitorio ao termo da liga á hora de decantar o nome do campión e, polo tanto, do equipo galego que ascenderá directamente á Segunda RFEF. En primeiro lugar, polo feito de chegar ao campo do seu teórico gran rival polo título sabendo que, de gañar, será o novo líder do campionato.
Con 26 puntos, o Compos mantense como único conxunto invicto da liga, pero só con 3 puntos máis que o Arousa. Sendo que o primeiro contabiliza 22 goles a favor e 11 en contra, polos 24 e 14 do segundo, un triunfo visitante, aínda que fose pola mínimo, desnivelaría a estatística para colocar ao cadro arlequinado por diante na táboa ao termo da décimo terceira xornada, superado xa o primeiro terzo do calendario do campionato.
Á motivación do premio inmediato en xogo, os de Gonza suman a súa tendencia á alza. Mentres o Compos acumula no último mes tres dos seus cinco empates, incluída a súa primeira cesión de puntos no Vero Boquete (1-1 ante o Barbadás, cun 2-1 sobre o Noia con gol de Maceira na prolongación), o Arousa botou o ferrollo á súa portería nas dúas últimas xornadas; e nada menos que ante dous dos seus tres rivais na zona de fase de ascenso: Somozas (0-0) e Estradense (2-0).