A Deputación achega a ao público infantil do Grove a historia das cantareiras galegas

As Letras Galegas seguen tendo unha fonda repercusión na programación cultural, cando menos na do Grove, que este mesmo xoves acollerá na Casa da Cultura Manuel Lueiro Rey, o contacontos «Cantareiras», a cargo da compañía Polo Correo do Vento. A actividade, organizada pola Deputación de Pontevedra, está dirixida ao público infantil e terá lugar nas dependencias da biblioteca municipal ás once e media da mañá. Mediante esta representación, o organismo provincial ten como obxectivo, segundo sinala, divulgar entre a infancia o papel fundamental que xogaron as cantareiras na conservación e difusión da lingua galega ao logo do tempo, unha tradición que se segue a conservar e goza de moi boa saúde.

A obra, que percorrerá un total de 35 concellos da provincia ata o vindeiro 31 de xullo, repasa a biografía destas mulleres, personificadas en figuras como a de Adolfina e Rosa Casás, de Cerceda; Eva Castiñeira, de Muxía, ou Manuela Lema, Prudencia e Asunción Garrido, integrantes das Pandereteiras de Mens, de Malpica.

A narración intercálase coa interpetación de pezas que elas cantaban e outras propias de cada unha das localidades onde se leva a cabo a actuación, e conclúe cun obradoiro de debuxo no que os nenos retratarán a unha das pandereteiras. A peza, que fai as delicias dos cativos alá onde vai, combina ilustración, literatura e música para continuar difundindo esta tradición cultural senlleira. Para acudir a esta actuación é necesario inscribirse previamente na biblioteca municipal, ben sexa presencialmente ou enviando un correo electrónico.

---

---

---