Sanmartín e Cabelo continúan no Cortegada, que ficha a Álex Hermelo como técnico axudante de Manu Santos
AROUSA
O novo segundo do banco do Mariscos Antón conta con experincia na canteira do Panathinaikos
02 jul 2025 . Actualizado á 05:00 h.Manu Santos ten dúas novas pezas no quebracabezas co que intenta equilibrar os modestos recursos económicos da Agrupación Deportiva Cortegada e a necesidade do Mariscos Antón de construír un novo equipo co que regresar, por segunda tempada consecutiva, á fase de ascenso á liga Challenge. En realidade, máis que dúas novas pezas, trátase de dous mozos que decidiron continuar coa aposta cruzada que manteñen co club vilagarcián.
A canteirá Marta Sanmartín seguirá desenvolvendo a súa desenvoltura na dirección do xogo con tan só 20 anos e a súa facilidade para romper defensas na liga Feminina 2. Teresa Cabelo, pola súa banda, intentará aos seus 19 anos empezar a ser o que en pouco tempo converteuse a xa exCortegada Iria Losada, unha pivote do país cunha enorme proxección e unha rápida progresión a pouco que se confíe nela.
Onda as dúas renovacións, o club anunciou a fichaxe de Álex Hermelo como técnico axudante de Manu Santos. Técnico deportivo superior en baloncesto, traballou sete anos no CAB Pontevedra e unha tempada na canteira do xigante europeo Panathinaikos de Atenas, integrando o corpo técnico da selección galega infantil masculina que este ano se fixo co bronce no Campionato de España.