Un mozo de Vilagarcía, trasladado en helicóptero á Coruña con graves queimaduras no rostro
AROUSA
O ferido sufriu unha descarga eléctrica no seu domicilio que lle afectou ao nariz, os ollos e o pescozo
13 may 2025 . Actualizado á 20:50 h.Un mozo de 22 anos permanece ingresado no Complexo Hospitalario Universitario de A Coruña desde esta mañá, afectado de graves queimaduras no seu rostro e no seu pescozo. O ferido, veciño de Vilagarcía de Arousa, foi atendido en primeira instancia polo servizo de Urxencias do Hospital do Salnés. Os facultativos comprobaron que presentaba queimaduras de terceiro grao, que lle danaran o nariz e os ollos. Unhas lesións que lle provocara unha descarga eléctrica que sufriu no seu propio domicilio.
Ante a gravidade das súas feridas, e unha vez que o equipo do Salnés conseguiu estabilizar a súa situación médica, o mozo foi trasladado por un helicóptero medicalizado do 061 á unidade de queimados do hospital da Coruña, a referencia para este tipo de danos. O prognóstico é grave.